Tanba, durante halo verifikasaun ba dadus UKL faze dahuluk no daruak Jacinta nia naran la tama iha lista konstrusaun uma.  

Jacinta husi Aldeia Anaulu, Suku Bahu, Postu Adminisitrativu Baukau Vila, Munísipiu Baukau, ne’ebé ho nia kaben (la’en) forma uma ka’in, maibé laiha oan.

"Verifikasaun UKL ha'u la hetan, ema sira verifikadór la mai, ida faze primeiru no segundu nunka mai," dehan Jacinta ba www.tempotimor.com iha Bahu Nagardjo, domingu (27/03).

Uma ne'ebé dadaun nia ho kaben (la'en) hela ba, kondisaun la permite ona, tanba tali tahan dodok hotu no didin aat ona, tempu udan labele deskansa di'ak.

Didin aat, maibé kontinua hili kalen aat ne'ebé ema so'e iha fatin lixu, hodi satan anin iha tempu kalan no loron.

"Hela iha ne'e tinan barak ona, hela uma hanesan ne'e de'it, ha'u nia la'en mós forsa laiha ona nia idade-60 nia hein bibi, kuandu udan ona ami iha okos muda tun sa'e de'it, la udan ne'e di'ak, udan  uma laran bee nakonu," nia informa

Nia parte mós rona informasaun husi komunidade seluk, dadaun ne'e Governu halo uma ba ema família kbi'it la'ek, maibé la to’o iha nia.

"Sira la mai ne'e, ha'u dehan kuitadu, uma aat hanesan ne'e, nusa ita nia xefi liurai nunka interese ita mai haree, ami na'in-2 mesak de'it, laiha ona forsa atu halo fali uma ne'e, iha be-oan feto ida mak hamutuk ho ami na'in-2, maibé nia sei ki'ik eskola SD, nia husi ha'u nia alin nia be-oan, ami rua nia oan laiha," nia hateten

Observasaun www.tempotimor.com iha terenu nota, tali tahan ne'ebé taka iha uma leten, balun dodok no kuak, nune'e udan been tama de’it iha uma laran no didin mós ho kalen dodok.

To'o notisia ne'e públika, www.tempotimor.com buka Xefe Suku Bahu, iha fatin sede Suku vila antiga Baukau Vila atu konfirma, maibé laiha fatin. (*)