"Negósiante ambulante sira ne'e, SERVE rejistu barak ona, iha ne'e husi Baukau iha ona 25 pursentu," dehan Koordenadór SERVE.ip sukursál Baukau, Raul Sanches Lajes iha kna'ar fatin vila nova, segunda (14/03).

Negósiante barak mak seidauk rejistu, maibé SERVE.ip liuhusi sosializasaun nafatin hakbesik aan ba negósiante sira hodi fó hanoin oinsá bele rejistu no hetan karta lisensa negósiu nian.

Maske iha ona lei fó multa ba negósiante ambulante sira ne'ebé seidauk rejistu, maibé seidauk implementa loos, tanba haree ba roda ekonómia ne'ebé la'o hela iha Timor-Leste.

"SERVE seidauk aplika buat ida multa, kuandu ita aplika multa ne'e dehan obrigatóriu, maibé lei hakerek ne'e obrigatóriu, so ke atraves Ministru sira mak fó hela oportunidade ba negósiante, empreza sira buat ida sei la'o hela ho konsensia," nia hatete

Maibé, nafatin halo sosializasaun ba negósiante sira, atu to'o ona data validu hakbesik aan ba SERVE.ip sukursal Baukau hodi halo renovasun.

Tanba, bainhira karta lisensa husi SERVE.ip liu ona data validu mak, Aifaesa halo fizkalizasaun hetan lakunas ruma sei fó penalti boot.

"Meius ida ne'e, ami nafatin divulga informasaun ba negósiante sira ambulante, loja sira ne'e fó hatene, SERVE iha ona lei atu fó penalti, maibé seidauk aplika, maibé kuidadu ho Aifaesa, tanba laiha toléra," nia akresenta

Husi inisiu to'o ohin loron, SERVE.ip sukursal Baukau identifika empreza públiku hamutuk 50 mak hetan ona penalti.

"Númeru ne'ebé mak durante ne'e SERVE rejistu tinan kotuk, rihun 3 resin, ne'e inkkui ona tipu negósiu-5 empreza nome individual (ENI), Unipesoal Lda, sosiedade anonimu (SA) ida empreza públik (EP), ida seluk ita bolu reprezentasaun permanente," nia dehan

Husi tipu negósiu-5 ne'e, tipu negósiu reprezentante permanente ki'ik liu, tanba kada tinan halo de'it renovasaun ba aktividade ne'ebé halo, mak hanesan Banku Nasionál Utramarino (BNU), Telemor, Telkomsel inklui Timor Telekom (TT).

Enkuantu tipu negósiu-4 seluk kada loron SERVE.ip sukursal Baukau sempre simu rejistu foun, maibé barak liu mak empreza nome individual (ENI), Unipesoal Lda.

"Kada loron ha'u foti de'it nia istimasaun, loron ida ita bele rejistu pur-volta 10 hanesan ne'e,"nia hatete

Entertantu husi Fulan-Janeiru to’o Marsu tinan 2022 SERVE.ip sukursal Baukau hatama reseita rihun US$3.242 ba kofre estadu. (*)