Diretór SEFOPE Munísipiu Baukau, Romualdo António de Souza hatete, formasaun ba lian koréa ne'ebé loke iha Munísipiu Baukau fatin rua, ida iha Sentru Dezenvolvimentu Komunitáriu, (CDC-sigla portugues) Triloka, rejistu ona joven pur-volta na'in-50 no iha fatin sentru formasaun vizaun foinsa'e Baukau hamutuk na'in-75.
"Dadaun sira halo inskrisaun atu loke iha tinan ida ne'e, ita rejistu joven kontinua ba formasaun lian koréa nian," dehan Roumaldo iha kna'ar fatin, vila nova, tersa (08/03).
Dadaun, joven sira tau naran ona, maibé seidauk bele realiza formasaun, tanba treinadór lian koréa husi nasaun koréa seidauk iha.
"Seidauk hahú, tanba fundus atu apoiu ba kapitál umanu seidauk, tanba mestri sira drop husi koréa mai ne'e, Governu tenke investe osan selu treinadór sira husi nasaun koréa nian," dehan Roumaldo
Bainhira formasaun lian koréa realiza, nafatin ho durasaun tempu durante fulan-6.
Enkuantu hahú husi tinan-2009 to'o 2018 sidadaun ne'ebé husi Munísipiu Baukau ba servisu iha koréa hamutuk na'in-329 no ba servisu iha Autralia hamutuk 105, ne’ebé kompostu husi feto no mane. (*)
