“Ami hakarak hanesan tau matan ba ami atu ami fila ba ami-nia fatin, ba fatin ne'ebé bee lori ona ne'e mak Governu lakohi tau matan entaun Governu fó de'it lona mai ami atu ami dada iha mota laran de'it ba ami atu hela, ami hakarak ba ami-nia fatin hodi tau matan mai ami”, deklara Vítima Dezastre Naturál, Clementina Trindade ba www.tmpotimor.com iha Salaun Dom Bosco Komoro, kuarta (02/03).
Vítima ne'ebé hakarak fila ba hela iha mota ninin Komoro tanba sira-nia moris loroloron depende ba piñera raihenek hodi sustenta uma laran no suporta osan sira eskola.
“Ami hakarak bá hela iha ne'ebá tanba ami buka moris ne'e iha ne'ebá, atu hola rai mós ami hola labele, ami sira hela iha mota laran mota lori ne'e tanba ami-nia servisu mak pinera raihenek de'it hodi selu oan sira nia eskola no sustenta uma laran”, afirma.
Iha loron 23 janeiru, mota Komoro konsege estraga komunidade kuaze 200-resin, uma no hela fatin nune'e sira deside ba hela iha Dalan Dom Bosco to'o agora, seidauk bele fila, tanba laiha dalan aternativu no fatin seguru ne’ebé vítima sira deside hafoin Governu fó apoiu materiál. (*)
