Prezidente CONISTIL Musulumanu Baukau, Samsul Bahari Ribeiro hatete, atu hatene númeru total komunidade Musulmanu iha Munisípiu Baukau, tanba ne'e sei hala'o durante fulan-ida tomak iha postu Administrativu Baukau Vila, Baguia, Kelikai, Laga, Vemase no Venilale.
"Ne'e ita atu hatete, komunidade Musulumanu iha Munisípiu Baukau ne'e totál uma hira, depois pesoal hamutuk hira, foti dadus hotu tiha sei hato'o ba nasionál, nasionál mak sei entrega dadus sira ne'e ba Governu," dehan nia iha Masjid Al-Amal Tirilolo Baukau, kinta (17/02).
Nune'e, Xefe ékipa remunerasaun Sensus Uma Ka'in Musulumanu 2022, Rodolfo da Conceição dos Reis Cabral hatete, sensus ne'e ezijensia husi Governu sentral atu hatene lolos totál uma ka'in Musulumanu iha Timor-Leste, nune'e bele responde tuir nesesidade relijiaun Islamiku nian.
"Objetivu ami hala'o rejistu uma ka'in iha teritóriu timor laran tomak atu hatene dadus komunidade Musulumanu feto mane labarik no estudante iha Baukau laran," nia hatutan.
Lansamentu Sensus Uma Ka'in Musulumanu 2022 ne'e realiza, tanba hetan apoiu husi Gabineti Apoiu Sosiedade Sivil, Primeiru Ministru. (*)