Login to your account

Username *
Password *
Remember Me

Kompetisaun Moris Halo Ema Fahe Malu, Odiu Malu no Esplora Malu

Padre (Pe), Aquile Sollo dirije hela misa iha Kapela Tasitolu Masinlidun, domingu (13/02). Padre (Pe), Aquile Sollo dirije hela misa iha Kapela Tasitolu Masinlidun, domingu (13/02). Foto Tempo Timor

Tempotimor (Dili)-Padre (Pe), Aquile Sollo hatete, kompetisaun moris dadaun ne’e haluha halo ema fahe malu, odiu malu no esplora malu, tanba preokupasaun mundu di’ak halo ema barak haluha Maromak ihaMoris.

“Agora tanba kompetisaun moris nian, dalaruma ita-nia matan, ita-nia foku hanoin ne'e baku liuba sasán sira, hanoin oinsá mak ha'u-nia kabun ne'e bele bosu, hanoin oinsá ha'u-nia isin ne'e bele fó hatais ne'ebé di'ak,. Tan de'it preokupasaun ida ne'e dalaruma ita haluha Maromak. Tan de'it preokupasaun ne'e ita ho ita fahe malu, odiu malu ba lolos, esplora malu ba lolos, ho ida ne'e halo ita haluha tiha maromak”, dehan Pe. Aquile iha nia omilia ba sarani sira iha igreja kapela Tasitolu Masinlidun, domingu (13/02).

Bainhira Maromak laiha ona sarani sira-nia laran no hanoin, iha momentu ne'ebá, ema ho ema la konsidera malu nu'udar ema, maibé konsidera malu nu'udar objek sasan ida ne'ebé nia bele uza, nia bele esplora.

“Entaun buat importante nu'udar fiar na'in, sarani ne'ebé di'ak mak ne'e, bele situasaun difísil oinsá, komplexu oinsá, maibé Maromak ne'e nafatin sai ha'u-nia sadere fatin”, afirma nia

Ho problema ne’ebé mosu oioin iha Dili, tanba ema lakoi haree ba sorin-sorin, maibé ema hothotu foku de’ita ba nia-an ne’ebé kontribui situasaun sai la hakmatek iha sosiedade.

“Nu'udar kriatura sosiál ita mós tenke kontribui ba vida sosiál, tenke iha mós sensibilidade iha situasaun ita-nia sorin-sorin, tenke loke matan, loke mós tilun, hodi hare, hodi rona mós situasaun sira ne'ebé mosu iha ita-nia sorin-sorin”, esplika nia.

Haree ba kompetisaun moris iha Dili maka’as tebtebes, no ida ne'ebé domina iha rai laran ne'e la'ós Timor, maibé estranjeiru de'it, Xina, Filipina, Austrália no Indonézia ema mak agora domina. “Ita sira ne'e mak abanbairua ema sei duni ba foho, ne'e presiza kbi’it, matenek, ita-nia kbi’it nia hun, ita-nia matenek nia hun mak Maromak, ita nafatin buka tempu buka Maromak”, afirma nia.

Ba família tenke fó atensaun másimu ba oan sira, tenke akompaña, hahú husi tempu hader to'o fali hatoba, Inan-Aman sira tenke akompaña, la'ós hatene de'it husik oan sira iha mundu maibé la hatene atu akompaña sira, la hatene atu servisu maka’as hodi sustenta sira, husik oan sira la hetan edukasaun iha família kona-ba valór no moral sira.

“Agora haree tok iha Dili, la'ós iha Dili de'it maibé Timor laran tomak inan nurak sira soe oan kintu kantu, tanba ladun iha edukasaun kona-ba valór sira iha família, ne'e importante tenke iha akompaña di'ak ba oan sira”, haktenik nia. (*)

Rate this item
(0 votes)
Last modified on Monday, 14 February 2022 10:31
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« August 2022 »
Mon Tue Wed Thu Fri Sat Sun
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31        

Tempo Timor Networks

Online Counter