Tuir fonte ne’ebé besik liu autoridade balun hatete, lista porfesór voluntáriu ne'e Eskola Ospitalidade Turizmu Bekora antes ne'e aprezenta ona ba edukasaun Munisípiu, maibé ikus mai la taka sai.

"Mais ami ba haree la'ós ami-nia naran de'it mak laiha mais ami-nia eksola mós naran laiha, eskola sira seluk iha hotu, e ami-nia mak laiha. Horisehik ami ba Edukasaun Munisípiu Dili, ami hasoru rekursu umanu, dehan fali lista laiha. Ami hatene dehan lori ba tiha ona, munking sira mak soe. E ami ba fali iha edukasaun nasionál, hasoru nafatin rekursu umanu, mós hanesan dehan laiha”, dehan fonte ne’ebé lakohi publika naran iha www.tempotimor.com, kinta (18/11).

Profesór voluntáriu ho inisiál hanesan JN, BP, FMD, F3 ne’ebé servisu voluntariamente iha Eskola Ospitalidade Turizmu Bekora, hahú iha tinan 2013 no balun tama iha tinan 2015. 

Mesmu nune'e naran hirak ne'e lakonsege tama iha lista verifikasaun Edukasaun Munisípiu Dili nian.

"Tanba lista naran ne'ebé ami hatama ba edukasaun Munisípiu Dili sira lakohi hatama ba sistema tanba sira uza ba partidarizimu tenke tama sira-nia partidu mak foin sira estabelese”, hatete nia.

Ba kestaun ne'e, Diretór Eskola Hospitalidade Turizmu Bekora (EHT), Carles Fatima Guterres, konsidera kestaun lista profesór voluntáriu haat ne'ebé la tama iha lista verifikasaun husi Edukasaun Munisípiu Dili, ne'e tanba kestaun liña koordenasaun.

"Sira haruka ami prepara lista dadus, tantu kontratadu, permanente, voluntáriu, ami sempre haruka ba parte dadus nian, no parte rekursu umanu nian. E dadus ne'e normalmente ita haruka hela de'it ba, tanba ne'e mak kontratadu mós, pasiénsia to'o sira-nia tempu mós sira asinatura kontratu sira ne'e lancar hela, ne'e kestaun de liña koordenasaun mak ladun la’o di'ak de'it”, hatete nia.

Bainhira ko’alia kona-ba partidu ne'e buat ketak, tanba Eskola tékniku ne'e presiza ema ne’ebé iha kompeténsia tékniku, atubele kaer eskola téknika.

“Ita liga ba dadus ne'e buat ketak ida, e parte eskola laiha pensamentu kona-bá politika”, dehan nia.

Maibé to’o notísia ne'e publika, www.tempotimor.com  seidauk konfirmasaun ho parte rekursu umanu iha edukasaun Munisípiu Dili nian, tanba okupadu ho servisu seluk. (*)