"Importante atu loke eskola ida naran (Eskola da Reis), atu forma profesór husi baze. Siknifika katak labarik sira foinsa’e husi SMA ou Liisensiadu ba ditretamente iha universidade durante tinan haat atu prepara sira atu hanorin eskola, tanba ami haree katak ida ne'e mak problema boot”, dehan nia hafoin halo audénsia ho Komisaun G iha PN, kuarta (17/11).

Tanba durante ne'e prosesu aprendijazen língua ladun di’ak, estudante Ensinu sira bainhira remata Sekundaria Jerál no privadu maibé ko’alia lian Tetun, portugés, ka Bahasa Indonézia, sei susar.

“Ami to'o iha konkluzaun ida katak problema boot edukasaun ninian ne'e mak kapasitasaun profesór sira. Ita sente hanesan ladun iha preparasaun tanba to'o agora Governu seidauk loke eskola ida atu prepara profesór atu ba hanorin”, afirma nia.

Dadauk, Grupu Sobre Reflesaun Edukasaun, iha membru kuaze 20-resin, balun vise ministru, no reitór universidade, ne'ebé tur hamutuk durante tinan 7 hodi tau hamutuk idea saida mak edukasaun ne'e presiza hadi’a.

Ho ida ne'e, konsege iha konkluzaun ida katak problema boot edukasaun ninian ne'e mak kapasitasaun profesór. 

"Ida ne'e se fose loke ona eskola ne'e, eskola ne'e naran ESE (Eskola Superior Edukasaun), ne'e atu prepara de'it profesór atu ba hanorin durante tinan haat”, esplika nia.

Kestaun atu hari’i eskola da reis ne'e la'ós planu foun ne’ebé foin iha, maibé estabelese tiha ona.

Tanba, iha tempu portugés, padre sira iha Soibada mós kria ajuda dezenvolve edukasaun sira ajuda loke eskola profesór katekista. 

"Hotu tiha, portugés sira ba fali eskola ida naran Eskola Kantor Rejende (EKR), forma profesór ne’ebé halo papel importante tebtebes iha kantor rejende”, hatete nia.

Aleinde ne'e, Indonézia mós konsege loke eskola ida naran Sekolah Pendidikan Guru (SPG), ne’ebé mak iha momentu ne’ebé rezolve problema SD iha Timór laran tomak. 

"Ne'ebe ha’u hanoin buat ne'e la’ós buat foun ida”, hatete nia. (*)