"Ha'u hato'o sentidu pézames ba família saudozu Max Stahl, ne'ebé sempre  hamriik metin ho nia husi tempu ne'ebé ita koñese iha Timor-Leste", dehan PR Lú Olo liuhusi komunikadu imprensa, kinta (28/10).

Ho laran taridu tebes Prezidente Repúblika simu notísia katak irmaun no kompatriota Max Stahl laiha ona.

"Ha'u fó-sai ha'u-nia rekoñesimentu ba buat hothotu ne'ebé Max Stahl halo ba ita-nia País no Povu, molok no hafoin restaura ita-nia independénsia, nu'udar ema ida kaer-metin kauza no Valór", hatete PR.

Nu'udar Prezidente Repúblika,  hetan previléjiu no onra hetan malu ho Max Stahl. "Iha hau-nia memória, ha'u sei rai metin lia-fuan sira ami na'in-2 hato'o ba malu no momentu di'ak horiuluk hamutuk".                                                                                                                  

"Ha'u sente katak parte ida husi Timoroan sira bá mós ho irmaun  Max. Saudade ne'ebé  ami hotu sente ohin sei rohan-laek", informa Xefe Estadu. (*)