Max Stahl hakotu iis, iha loron 28 fulan-outubru, iha Ospitál Princess Alexandra Brisbane, Austrália, vítima husi moras ne'ebé kleur, iha loron ne'ebé hanesan bainhira ita selebra tinan 30 ba Sebastião Gomes nia mate, ne'ebé ninia omenajen mak hamosu masakre Santa Cruz. 

Christopher Wenner, koñesidu liu ho naran Max Stahl, moris iha loron 6 fulan-dezembru tinan 1954 iha Reinu Unidu (Inglaterra).

Portavóz Governu, Ministru Prezidénsia Konsellu Ministru, Fidelis Leite Magalhães hatete, prosesu halot matebian Max Stahl, Governu Timor-Leste sei koordena ho família oinsá atu foti.

"Kona-ba ida ne'e ha'u seidauk bele divulga informasaun ba ita-boot sira tanba sei iha liña koordenasaun entre Governu ho família matebian”, informa Fidélis iha Palásiu Governu, kinta (28/10).

Tanba ne’e,lori Governu no Povu Timor-Leste tomak nia naran, hato'o sentidu kondolénsia kle'an tebes ba família no amigu estimadu Max Stahl nian.

Iha ne’e, Povu Timor-Leste mós nafatin agradese ba ninia kontribuisaun ba autodeterminasaun nasionál no ninia korajen no legadu husi nia serbisu sei nafatin metin iha sidadaun hotu nia memóri. (*)