“Diskursus no mensájens halo durante mandatu tinan rua tama iha livru ne’e reflekte ha’u-nia kompromisu sanulu-resin-hitu, ne’ebé ha’u foti, iha 20 maiu 2017, nu’udar Prezidente Repúblika”, dehan Lú Olo iha Palásiu Prezidensiál Bairopite, sesta (06/08).

Kompromisu sira ne’e hotu reagrupa no inkorpora iha área atuasaun oioin, iha ámbitu kompeténsia konstitusionál no haktuir nia dezeju atu tuba metin nu’udar ‘Prezidente ema hotu nian no ba ema hotu’, ho atensaun espesiál ba: Afirmasaun no reprezentasaun Estadu, Koezaun no integridade Estadu, Koezaun no unidade nasionál, Defeza no seguransa, Paz, estabilidade, polítika no dezenvolvimentu, Kooperasaun ho governu kona-ba polítika, programas no Objetivu Dezenvolvimentu Sustentável, Kombate korrupsaun no diskriminasaun ba ema, Kombate violénsia hasoru feto no labarik no protesaun meiu ambiente ba saúde públika no dezenvolvimentu sustentável.

“Iha livru ne’e mós bele haree katak ha’u serve ho lealdade ha’u-nia kna’ar ne’ebé ha'u simu, kumpri no haruka kumpri Konstituisaun no lei sira no dedika ha’u-nia enerjia no kapasidade ba defende no hametin independénsia no unidade nasionál”, afirma nia.

Tanba Estadu no nasaun ne’ebé iha hametin husi identidade ida ne’ebé mai husi luta libertasaun nasionál ida ne’ebé oinseluk liu, nasionalista sira hotu sente no tanen metin, sei hamanas nafatin sidadaun hotu nia laran.

Konseitu, valór no prinsípiu ne’ebé hahú no hametin ho movimentu unidade nasionál, iha meadus anus setenta, mak hamoris sentidu foun ida katak pertense ba povu ida no Pátria ida.

“Ho orgullu boot tebes mak ha’u haksolok-an ho sentimentu pertensa ba buat ida ne’ebé ita hotu nian, ne’ebé kesi ita hamutuk. Buat ne’ebé espesiál no forte, hametin iha luta, mak fó forsa no korájen atu hasoru dezafiu kompleksu no foti desizaun difísil sira, nu’dar Prezidente Repúblika”.

“Iha prosesu foti desizaun sira ne’e, iha situasaun sira ne’ebé krítiku tebes, laiha desizaun ida ne’ebé ha’u foti sein konsulta iha nível internu no bainhira presiza, iha nível esternu mós, envolve personalidade sira ne’ebé ha’u konsidera importante ba kazu ida-idak”, dehan PR.

Iha ne’e Prezidente Repúblika sei defende nafatin diálogu tanba dalan ida ne’e mak di’ak liu atu hakaat buat ne’ebé haketak no hetan solusaun konsensu, atu hothotu sente halo parte mós prosesu ne’ebé iha karáter nasionál nune’e bele haboot-an babeibeik atu afirma-an nu’udar Povu no hametin Estadu Direitu Demokrátiku.

“Ha’u fiar katak ha’u kumpri duni ha’u-nia kompeténsia no responsabilidade konstitusionál, no to’o ne’ebé ha’u bele halo, ha’u-nia kompromisu sira hato’o iha loron ha’u simu posse iha Tasitolu”, hatete Lú Olo.

Ba sidadaun sira ne’ebé hakarak koñese di’ak liu Lú Olo nia perfil nu’udar Prezidente Repúblika, bele lee volume ida ne’e hodi tetu rasik. Livru ne’e sei hatama iha biblioteka prinsipál Díli nian no munisípiu sira seluk no RAEOA.

“Ha’u hakarak halo apelu espesiál ba Ministériu Edukasaun, Juventude no Desportu, Ministériu Ensinu Superior no Kultura no parseirus Governu nian ba edukasaun no formasaun sívika atu uza livru ne’e iha debate sira, iha nível ensinu hothotu, atu hothotu hatene kna’ar importante Prezidente Repúblika ida nian, liliu, iha koezaun Estadu no Povu Timor-Leste nian”, apelu PR.

Ba ida ne’e, konta ho kolaborasaun espesiál Igreja Katólika nian, parseira boot liu Governu nian, iha área edukasaun no formasaun sidadaun responsável sira, ho rede boot eskola namkari iha País tomak.

“Ha’u konta mós ho kolaborasaun husi entidade públika no privada sira, partidus polítiku, konfisaun relijioza sira seluk nomós husi organizasaun sosiedade sivíl sira”, afirma nia.

Nune’e, livru sei halo parte memória institusionál. Tenke halo mós parte memória ne’e, livru diskursus husi prezidente nia antesesor sira, Prezidente Repúblika sira molok nia rasik nomós husi titular órgaun soberania sira seluk nian.

“Ha’u dezeja tebes katak livru sira la’ós atu rai de’it iha uma ka iha biblioteka, maibé atu estuda no ha’u konvida hothotu atu estuda perfil titular órgaun ida-idak nian, la’ós de’it liuhusi ida-idak nia legadu eskritu, maibé sira-nia asaun konkretu iha tinan ruanolu nia laran ba obra koletiva ida: ita-nia Timor-Leste ohinloron”, hakotu Lú Olo. (*)