Embaixadór Australia mai Timor-Leste, Peter Roberts hatete, aplikasaun sira ba Bolsa Estudu Austrália iha Timor-Leste, tinan 2021, sa’e ba porsentu 38 to’o númeru ida ne’ebé as liu kompara ho tinan 2020.

Tanba iha tinan 2020 ne'e hetan de'it 282, maibé aplikasaun ne’ebé submete ba tinan 2021 hamutuk 368.

Husi totál aplikasaun ne'e, feto mós aumenta porsentu 28 ba aplikasaun tinan uluk nian, no aplikasaun hosi ema ho defisiénsia sa’e dala tolu.

Maske mosu inundasaun no restrisaun Covid-19 nian, maibé feto 176 no mane 192, inklui ema ho defisiénsia 16 hetan ona oportunidade atu ba estuda iha universidade sira ne’ebé di’ak liu iha Austrália tinan 2022.

“Ha’u haksolok tebes haree númeru aplikasaun bolsa estudu Austrália nian ne’ebé aas tebes iha tinan ida ne’e. Kontente liután wainhira haree feto no ema ho defisiénsia barak liu mak aplika ba bolsa estudu ne’e”, dehan Embaixadór Peter Roberts, tersa (28/06)

Númeru aplikasaun ne’e hasa’e liuhosi kampaña promosaun ida inklui sesaun informasaun 36 kobre munisípiu sia, ne’ebé envolve feto no mane 800 liu.

Kada tinan programa bolsa estudu Austrália oferese mínimu bolsa ida ba ema ho defisiénsia, desde tinan 2018.

“Ami fornese ona formasaun sira hodi kria plataforma ida ba aplikante sira ho defisiénsia ne’ebé iha potensia, ne’ebé bele prienxe ho di’ak rekezitu sira lingua nian ba bolsa estudu internasionál”, afirma nia.

Tanba dadaun ne’e, formasaun sira inklui kursu Inglés kona-ba empregabilidade fulan 18 iha SENAINT no kursu badak lian Inglés periodu rua ne’ebé fornese liuhosi kolaborasaun ho organizasaun ema ho defisiénsia nasionál sira.

Iha mós bolsa estudu hamutuk rua-nulu ne’ebé finansía hosi Governu Austrálianu sei fó iha tinan 2021, bainhira bolseiru sira gradua sei hola parte iha antigu alunu 339 uza sira-nia edukasaun exelente hodi kontribui ba dezenvolvimentu Timor-Leste nian. (*)