Iha serimónia graduasaun ba dasia ne'ebé eskola ETI-DILI realiza ne'e, diretór eskola ETI-DILI Dionísio Ximenes katak, estudante sira ne'ebé ohin hetannona graduasaun, prontu ona atu tama iha kampu servisu.

"ETI hamriik hanesan ensiku tékniku vokasionál ida iha nivél nasionál, rejionál no internasionál, hodi produz graduadu ne'ebé matenek, profesionál ne'ebé prontu tama iha kampu servisu no kontinua iha ensinu superiór sira," dehan Diretór ETI-DILI Dionísio Ximenes liuhusi nia diskursu iha serimónia graduasaun ba estudante finalista sira iha Edifísiu IOB Fomentu, Segunda (28/12).

Diretór ne'e mós afirma, durante ezisténsia ETI-DILI, konsege produz ona graduadu hamutuk na'in 1.654. Maibé bainhira hamutuk ho ETI Maliana, ETI Baukai no ETI Atelari, prodúz graduadu liu ona rihun rua.

Tuir nia, graduadu ne'ebé ETI prodúz barak mak iha ona kampu servisu, inklui graduadu na'in 298 ne'ebé ohin gradua, balun hetan ona empregu, bainhira sira ba hala'o ona sira-nia estajiu iha instituisaun governu no privadu sira.

Iha fatin hanesan, estudante Justiliano da Silva husi departamentu tékniku informátika multimédia sente kontente, tanba bele remata ona estudu durante tinan tolu iha ETI-DILI.

"Ha'u haksolok tebes, tanba bele remata ona ha'u-nia estudu iha nivél sekundária, mezmu iha dezafiu oioin kona-ba finanseiru, maibé konsege realiza mehi ne'ebé ha'u iha," dehan graduadu ne'e.

Nia dehan, ninia estudu durante ne'e fokis liu iha parte Hardware ne'ebé oinsa atu halo instalasaun ba komputadór no intala ligasaun internet nian.

Entretantu estudante 298 ne'ebé ETI prodúz ne'e hala'o kursu iha departamentu neen, mak hanesan tékniku linguajem ba produsaun, tékniku jestaun ba ekipamentu informátika, tékniku multimédia, tékniku ba eletrisidade, tékniku eletrónika audiu, vídeo no televizaun no tékniku ba kontrusaun sivíl.(*)