Sekretariu Estadu Teofilho Caldas dehan, tuir lei SEAK iha kompetensia atu dezenvolve fatin istoriku sira, maibé tanba uma ne’ebé uluk Xanana subar nu’udar uma privadu, SEAK labele halo buat ida bainhira uma-nain lakohi.
"Abrigu ida Komandante Ein Xefe Kay Rala Xanana Gusmão nian iha Lahane, iha ita-nia señora Aliansa Araújo ninia rezidénsia ne'ebé mak iha tinan 1992 inimigu kaptura ita-nia lider Xanana iha ne'ebá, entaun tuir lei SEAK iha kompeténsia atu halo prezervasaun no dezenvolve fatin ne'e sai hanesan fatin turizmu, maibé infelizmente uma-nain la fó, entaun ita labele halo buat ida," dehan Teofilho ba jornalista sira iha edifisiu Fakuldade Siénsia Sosiál, UNTL, Kaikoli, Tersa (25/08).
Maske iha Lahane uma-nain la fó, maibé iha abrigu balun iha Kakaulidun konserva ona.
"Ita dezenvolve ona mak abrigu ida iha Kakaulidun, entaun serbisu hamutuk ho Ministériu Turizmu, Komérsiu no Indústria par bainhira turizmu mai vizita, kanaliza sira ba fatin refere," nia dehan.
