Semana Oin, ‘Funu’ Kontra Ministru Longuinhos

MInistru Edukasaun Ensinu Superior Siencia no Kultura, Longuinhos dos Santos MInistru Edukasaun Ensinu Superior Siencia no Kultura, Longuinhos dos Santos Foto ofisial

Tempotimor (Dili) - Komandu Jerál Polísia Nasionál Timor-Leste (PNTL) fó ona lisensa ba Aliansa Univesitáriu Timor-Leste (AUTL) hodi halo manifestasaun hasoru VIII Governu, liuliu Ministériu Ensinu Superiór Siénsia no Kultura (MESSK), tanba estudante universitáriu iha rai-laran sente injustisa ba desizaun governu nian.

“Ohin ami mai hasoru malu ho parte seguransa, tanba iha semana kotuk ami submete karta mai iha Komandu Jerál PNTL, entaun komandu notifika fali ami, entaun ohin ami mai hasoru malu ho parte seguransa nian hodi halo seguransa ba asaun pasífika ne’ebé AUTL sei hala'o iha loron 17-21 Agostu 2020,” dehan Portanvós AUTL, Moises Soares Magno, ba jornalista sira, iha Komandu Jerál PNTL, Kinta (13/08).

Nia dehan, objetivu husi asaun pasífika ne’e mak atu ejize direitu estudante nian hanesan ho estudante iha estranjeiru.

“Maibé estudante husi ensinu superiór iha rai-laran la hetan, depois ami la'ós ezije subsídiu, maibé ami husu para governu fasilita ka responsabliza netik ami iha propina ba semester pár tinan 2020 nian, ” nia dehan.

Nia mós subliña, rekoñesimentu ba PNTL ne’e atu halo seguransa ba manifestante sira hodi labele viola regra manifestasaun nian iha lei númeru 1/2006 nomós leoi kódigu estrada nian númeru 6/2003.

Hataan ba pedidu AUTL nian, Portavós Komandu Jerál PNTL, Superentendente Xefe Arnaldo Araújo hateten, PNTL autoriza no asegura seguransa ba asaun pasífika ne’ebé sei akontese iha 17 Agostu 2020.

“PNTL husu sira labele sees husi Lei Númeru 1/2006. Depois sira halo manifestasaun tanba lei mak fó dalan ba sira,” dehan nia.

Komandante ne’e mós subliña, manifestante sira atu halo manifestasaun tenke dook husi edifísiu estadu ka metru 100. Alende ne’e, manifestante sira mós tenke kumpre lei númeru 5 kona-ba arma branka.

Entretantu, iha soru-mutu ne’e, hetan ona konsensu husi PNTL no AUTL katak, manifestante sira só halibur malu iha fatin ne’ebé atu halo asaun pasífika, maibé la'ós mai ho grupu, maibé manifestante ida-idak la’o mesak.

“Ohin konkordansia iha tiha ona, katak sira la mai grupu husi sira-nia kampus mak konsegra iha fatin manifestasaun nian, maibé sira bele mai na’in ida-idak ho sira-nia transporte depois mak konsetra iha fatin ne’ebé destinadu ona,” nia dehan

Tuir nian, maski iha estadu emerjénsia, maibé PNTL ho AUTL entaun, asaun kontinua la’o maibé tenke kumpri regras sira, importante liu mak uza maskara.

Entretantu masa ne’ebé atu hola parte iha asaun pasifika ne’e mai husi Univesidade haat no institute superiór haat mak sei hola parte iha asaun pasifika ne’e, no asaun pasifika ne’e rasik sei la’o durante semana ida tomak, tanba hahú husi loron 17-21 agostu 2020. (*)

Rate this item
(0 votes)
Last modified on Thursday, 13 August 2020 20:00
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.