Profesór reklamante husi Eskola Ensiñu Sekúndaria Jerál (ESG-sigla portugés) Filial Dom Carlos Ximenes Filipe Belo, Eduardo Ximenes, haktuir, orientasaun husi Ministériu Edukasaun Juventude no Desportu (MEJD) katak, profesór voluntáriu ne'ebé la liu selesaun rekrutamentu ba kontratadu, tenke submete ona karta reklamasaun, liuhusi Diresaun Servisu Edukasaun Munisípal ba MEJD, nune'e tempu besik bele hetan solusaun.
Husu MEJD atu aselera rekolla dadus profesór reklamante iha nivél Munisípiu, nune'e bele públika hikas rezultadu tuir planu MEJD nian iha tempu besik.
"Ami hatama reklamasaun, sira dehan de'it tempu badak sei solusiona ami nia problema, tanba ne'e tenke publika rezultadu iha tempu besik mak abríl, maibé kleur ami sei impede servisu Ministériu Edukasaun Munisípiu, no la fó valór ba estudante iha primeiru periodu", dehan nia iha vila nova, segunda (27/02).
Tanba profesór reklamante na'in-348 husi Baukau, la satisfas ba rekezitu MEJD nian, ne'ebé aprova iha loron 05 fulan-agostu tinan 2022 katak, kandidatura tenke sidadaun Timoroan ne'ebé bele aprezenta kartaun eleitóral no Billete Identidade (BI) iha kurikulum vitae, idade 17-50, aprezenta foto kopia habitasaun literaria legalizadu mininu baxarelatu, karta deklarasaun husi eskola, profesór voluntáriu iha eskola privadu hanesan katóliku, husi tinan 2003-2013, inklui mós profesór voluntáriu husi 2007-2014, profesór voluntáriu iha eskola públiku husi tinan 2007-2017, inklui eskola públiku por nesesariu 2018-2021.
Maibé profesór balun liu selesaun ba kontratadu ne'ebé naran iha Jornál da Repúblika ba Munisípiu Baukau nian, deskonfia profesór voluntáriu na'in-2, tuir loloos labele liu selesaun, tanba la priense rekezitus MEJD nian, ne'ebê temi iha leten.
"Primeiru profesór Berta da Costa Jereño data moris 11 janeiru 1971, bele liu selesaun, segundu, naran Jency Sebastian, tuir kritériu katak, sidadaun Timoroan, tenke iha BI no Eleitóral, maibé nia númeru eleitóral laiha iha lista públikasaun, entaun nia ema estranjeiru", nia esplika
Husu MEJD lalika halo diskiriminasaun ba profesór voluntáriu sira, maibé di'ak liu valóriza hotu profesór voluntáriu hotu iha teritóriu laran, tanba tinan barak ona ho voluntáriamente sakrifika aan kontribui ba área edukasaun nian.
Hatan ba kestaun ne'e, Diretór Servisu Edukasaun Munisípiu Baukau, Augusto Ornai Ximenes, la fó komentáriu ruma ba asaun ne'ebé profesór reklamante sira atu halo, tanba kompeténsia MEJD nian.
"Ne'e ema nia direitu, tanba ne'e reklamasaun ida ba parte kompetente buka solusaun", nia hatete
Maibé tuir orientasaun MEJD fó tempu ba profesór voluntáriu, ne'ebé laliu selesaun rekrutamentu ba kontratadu, atu reklama aan liuhusi karta reklamasaun diriji ba MEJD hodi buka solusaun.
Nune'e Servisu Edukasaun Munisípal simu ona karta reklamasaun husi profesór reklamate na'in-348, atu submete ba nasionál hodi solusiona.
Enkuantu rekrutamentu profesór voluntáriu ba kontratadu tinan 2022, Munisípiu Baukau aprezenta kandidatu profesór voluntáriu hamutuk 625, kompostu husi pre-eskolar, to'o nivél sekúndaria públiku no privadu, maibé profesór na'in-277 mak liu selesaun kualifikadu, enkuantu na'in-348 la liu selesaun, tanba la priense rekezitus husi MEJD. (*)