Tanba Governu aloka ona orsamantu ba MEJD iha tinan 2023, hamutuk tokon US$30, ne'ebé kompostu husi OJE 2023 ba fundu infraestrutura edukativu tokon US$15, inklui fundu empresta husi banku mundiál tokon US$15.

Nune'e MEJD sei konstrui no reabilita eskola hamutuk 300-resin iha Munisípiu 13, inklui Munisípiu Baukau.

"Ministériu aprova fundu infraestrutura liuhusi projeitu komunitáriu, ita baukau hetan 14 iha tinan ne'e, Postu Kelikai mak hetan 6, Postu seluk balun hetan 1 ou 2 hanesan ne'e", dehan Diretór Servisu Edukasaun Munisípiu Baukau, Augusto Ornai Ximenes, iha vila antiga, kinta (23/02).

Eskola 14 iha Baukau ne'ebé tama iha lista PKRIE 2023, eskola 13 forma ona nia ekipa komunitáriu hodi hein alokasaun orsamentu, tanba tuir oreintasaun husi MEJD, ne'ebé tuir planu, sei hahú servisu ba konstrusaun no reabiltasaun eskola iha fulan-abríl tinan 2023.

Enkuantu konstrusaun no reabilitasaun ba tinan 2023 iha Baukau hamutuk 14 ne'e, kompostu eskola públiku no privadu sira, husi nivél ensiñu pre-eskolar to'o ensiñu sekundáriu.

Tipu konstrusaun ba eskola sira, husi sala 3-6, ne'ebé kompleta ho sala eskritóriu ba profesór, sala aprendisajen ba estudante inklui sanitasaun.

Maske tinan 2021-2022 MEJD implemanta ona PKRIE ba Baukau hamutuk 29 ho millaun US$302.014-resin, maibé seidauk bele responde ba preukupasaun infraestrutura edukativu nian, tanba kondisaun eskola barak mak sei aat no grave.

"Ita sei presiza barak, tanba Munisípiu iha lista prioridade kada tinan ita tau 20-resin, maibé mai mak 14 de'it, ita preukupa tebes kondisaun eskola sira ne'e", nia akresenta

Entretantu totál eskola husi eskola públiku no privadu kompostu pre-eskolar to'o sekúndariu iha Baukau, hamutuk 243. (*)