"Prosesu rekrumentu no selesaun ba professor voluntáriu ba kontratadu la'o iha tempu naruk ona desde 2021 mai to'o 2022 no fin ita konsege ba prosesu selesaun dokumentu ba professor voluntáriu iha Munisípiu 13 inklui RAEOA hamutuk 2.910 ita hetan admitidu totál 1.539 no la admitidu 1.371", dehan nia iha Salaun enkontru MEJD, Kaikoli, tersa (14/02).
Maibé, etapa tuir mai Ministériu Edukasaun Juventude no Desportu mós sei loke reklamasaun por eskritu ba profesór Voluntáriu sira ne'ebé mak la passa ba iha profesór kontratadu.
"Ita sei reklamasaun durante loron 15 nia final to'o iha loron 28 fulan-Fevereiru tinan ne'e, em prinsipiu sira halo reklamasaun iha nivel Munisípiu para labele hotu-hotu mai konsentra iha ne'e", nia dehan
Hafoin Reklamasaun hotu sei halo verifikasaun bainhira iha dadus ne'ebé kompletu sei hakat ba segunda faze ne'ebé sei tuir mai.
"Reklamasaun iha parte rua, ida nia reklama ha'u hanorin tanba saida mak ha'u la liu, ida seluk mak, ida seluk ne'ebá nia la hanorin, maibé tanba saida mak nia liu vaga ba profesór kontratadu", nia esklarese.
Husi profesór Voluntáriu sira ne'ebé admitidu sei aumenta tan mestre ba programa eskola iha uma hamutuk 176.
"Husi ida ne'e pre-eskolár iha 121, ensinu báziku 894, ensinu sekundaria jerál 398, ensinu tékniku vokasional 126, Programa eskola iha uma 176 nia totál mak 1.715, rezultadu ne'e ita públika ona jornál da Repúblika", nia hatutan.
Relasiona ho professor sira ne'ebé admitidu ona sira nia salariu sei mantein nafatin dekretu lei ne'ebé dadaun aplika hela mak hanesan, pre-eskolár nia saláriu US$204.00, profesór ensinu báziku nia saláriu US$272.00 no mós ensinu sekundária mós US$272.00. (*)
