“Ami-nia enkontru ohin loraik hamutuk ho na'i-prezidente ba dahuluk. Ami husi pároku Laklo, ha'u nu’udar amu pároku, ho Konsellu Parokiál, Konsellu ekonómiku, Sekretáriu Jerál Akólitu Dioseze Baukau, hamutuk ho Komisaun Organizadora ba Kongressu Akólitu nian ne'ebé sei realiza iha tinan ida-ne'e, hamutuk mós ho Akólitu sira. Ami mai iha ne'e ba dala-uluk hakarak felesita ita-nia na'i-prezidente Dr. Ramos Horta, e tuir mai hakarak konvida nia atu ba partisipa netik kongressu ne'ebé, ami atu realiza Kongressu Akólitu Vokasional nian”, dehan Amu Pároku, Abilio da Costa, iha Palásiu Prezidensiál Bairo Pite, segunda (01/08).

Ba atividade Akólitu Vokasionál ne'e sei realiza tuir nivél Dioseze Baukau katak pároku hothotu ne'ebé pretense ba Dioseze Baukau nia laran tomak, ninia Akólitu reprezentante ema tolunulu-resin-lima, mak sei ba partisipa Kongressu iha Parókia Laklo hahú husi loron 24 to'o 26 fulan-agostu tinan 2022.

Konvite ne'ebé hato'o ba Xefe Estadu atu iha disponível bele ba ko'alia iha selebrasaun ne’e liga ho sira-nia moris nu'udar Akólitu iha futuru.

Maibé ba konvite refere, Prezidente Repúblika labele atende, tanba foin lalais Xefe Estadu simu tiha ona konvite husi Komisaun Juventude Katólika Timor-Leste husi nível dioseze, tanba ne’e, Xefe Estadu sei ba partisipa atividade kongressu juventude Katólika ne'ebé sei realiza iha Pároku Lolotoe, Munisípiu Bobonaro.

Purtantu ko'alia kona-ba prosesu ba Amu Bispu foun iha Dioseze Baukau, ida-ne'e sei iha prosesu laran maibé husu atu sarani sira nafatin akompaña prosesu ida-ne'e ho orasaun.

“Tuir ami-nia hatene sei prosesu, konfirme ami dala-ida ba enkontru iha Dioseze, aman administradór dehan sei prosesu ne'ebé ita akompaña nafatin ho orasaun atu iha tempu badak nia laran ita-bele hetan ona ita-nia Bispu foun ba ita-nia Dioseze Baukau”, afirma nia. (*)