“Objetivu enkontru ohin, ko’alia liu kona-ba asuntu Edukasaun nian. Lós duni katak edukasaun importante tebes tanba ne'e, hetan mós atensaun husi Prezidente Eleitu. Nune'e, Prezidente Eleitu disponibiliza tempu hodi hasoru malu ho ami ko’alia, fó ideia ruma atu hadi’a ita-nia Edukasaun. La'ós atu troka Ministru ka Ministériu Edukasaun”, dehan Padre Mateus Afonso iha Gabinete Novel ba Paz, Farol-Dili, kuarta (04/05).

Tanba ne’e, atu kria tan Gabinete ida hodi foka mós ba Edukasaun nian hodi fó ideia no promove nível edukasaun nian iha nível hothotu hahú pre-eskolar to'o sekundáriu bele mós to'o iha Universitáriu sira.

Maibé fundasaun tolu sei organiza atu valór kristaun nia iha Eskola Katóliku no Públiku la'ós Relijiaun ka Moral de’it maibé mós karater Edukasaun nian.

“Parte Fundasaun Baukau, Dili no Maliana sei organiza sira atu valór kristaun nian iha Eskola Katóliku no Públika sira. La'ós kestaun Relijiaun ka Moral d’eit maibé karater Edukasaun ba Eskola Katólika no Públiku maibé Edukasaun Katólika ne'e mak ami informa ba Prezidente Eleitu atu iha nia mandatu tuir maibé bele iha atensaun hodi halo kooperasaun hodi suporta no fó motivasaun ba Ministériu Edukasaun no bolu Uma Kreda sai Parseiru”, afirma nia.

Enkuantu problema edukasaun mak Eskola Katólika sira laiha osan atu selu Profesór sira. Tanba maioria profesór sira mesak funsionáriu ne’ebé ho razaun Governu mak selu, la'ós Igreja mak selu ne’ebé hanorin tuir sira-nia hakarak mak sai problema ba eskola Katólika sira.

Tanba ne'e, mak presiza atensaun la'ós atu rekruta maibé fó subsídiu hodi reforsa Instituisaun katóliku iha Eskola Katólika nian. Tanba Uma kreda la’ós tau matan de’it ba Eskola Katólika sira maibé ba mós Eskola Públiku sira tanba ema Katólika barak mak eskola iha eskola públiku sira.

Prezidente Eleitu, José Ramos Horta hatete, tuir lei organika Prezidente Repúblika nian bele muda no halo adapta maibé sei haree Departamentu ida liga ba Assuntu Edukasaun, Kultura, Sosiál, Justisa no Direita Umanu nian ne'ebé hanesan komponente grande Prezidente nian la’ós atu hadau kompeténsia Governu nian nu’udar tanen responsabilidade hothotu nian iha setór Edukasaun, Kultura no Rekonsiliasaun.

Tanba kestaun edukasaun sai prekupasaun ba líder nasionál sira laiha ida mak mak la preukupa kona-ba kualidade edukasaun iha Timor. Tanba Kualidade edukasaun tenke metin ho Estratéjia no vizaun atu ema hothotu 100% Edukadu.

Bainhira ema edukadu iha valór umanu, diretu umanu, relijioza no espirituál maibé importante mak parte tékniku sientifiku profesionál atu kompete iha reziaun no mundu.

Ba tinan lima mai Timor tenke adapta edukasaun no teknolojia iha sekulu XXI nian ba realidade ekonomia, rejionál no mundiál. (*)