“Ne'ebé ohin loron, ha’u mak hela iha ne'e, ha’u mak tahan netik iha ne'e, Nicolao nia moris fatin, maske iha ai-laran, maske iha duut laran, maske fatin ida ne'e la di'ak, maibé kuitadu ha’u ho ha’u-nia katuas uma mesak ida ne'e mak defende iha rai ida ne'e, ema seluk la mai tau matan iha ne'e”, esplika Reprezentante Família, José Felis Andrade Lobato, hafoin simu vizita husi Kandidatu José Ramos Horta iha Prezidente Nicolao Lobato nia moris fatin, Soibada, kinta (07/05).

Família hakarak tatoli hela ba kandidatu José Ramos Horta nu’udar maun, tiun no avo, ne'ebé mak bele vizita fatin ida ne'e, atu ba futuru bele hanoin oinsá atubele konserva.

Tanba fatin ida ne'e maske importante tebtebes iha Timor-Leste nia istória, maibé dadaun dut laran hela, ai-laran hela, laiha lider ida mak hanoin atu tau matan.

Saudozu Nicolao iha família hamutuk 13, maibé 12 mout, mate tanba funu ida ne'e nia halhalok hodi ohin loron família ida ne'e mohu, hela de'it ona mak Rogeiro Lobato.

Durante iha situasaun luta nian, iha líder balun konsege ba subar iha fatin refere no Nicolao Lobato nia família restu mak subar sira, durante tinan sanulu nia laran husi (1989 to'o 1999).

“Mai subar sira iha ne'e, sa'e tiha boot nunka mai rekoiñese. E konsidera fatin ida ne'e, hanesan fatin ida ke la vale”, dehan nia.

Durante ukun-an nia laran, Prezidente Nicolao nia moris fatin iha líder na’in-rua mak vizita, hanesan Kay Rala Xanana Gusmão no José Ramos Horta, hodi konsidera nafatin fatin ida ne'e, nu’udar Saudozu Nicolao Lobato nia moris fatin. (*)