“Komandante boboot sira sei moris hela maibé haluha tiha ninia soldadu sira, e haluha tiha ninia maun alin sira, ne'e lamentável husi família sira ne'ebé mak dadaun ne'e sei tur hela ho lutu tur hela ho matan been. Favor ida líder sira imi iha netik, hanoin netik ba imi-nia maluk sira ne'ebé mak luta hamutuk ho imi, labele ami família de'it mak ejize, ami laiha kbi'it, maibé ami iha ibun hanesan mós ho ita-boot sira”, dehan Deputadu Bankada PLP, Noe da Silva ‘Buka Tuir’ iha plenária PN, tersa (14/06).
Tanba agora sidadaun lubuk ida to'o ohin loron tur hela ho lutu no halerik hela ba Estadu, wainhira loos mak Estadu bele hasai naha todan ne'ebé to'o ohin loron sira nia Família dezaperasidu hela.
Tanba ne'e, husu Estadu liliu Líder sira iha interese atu buka tuir maluk sira ne'ebé uluk fó-an mate ba funu, tanba saudozu Nicolau Lobato ne'e ema eroi boot ida iha Timor-Leste.
Bankada PLP ko'alia ne'e tanba uluk kuandu iha ai-laran, líder sira ne'e promete ba malu ona katak ida ne'ebé mak ba mate ne'e ida moris ne’e mak sei ba buka tuir fali ida mate ne'e.
“Maibé pelu kontrariu tiha fali, ida moris agora mai buka de'it mak osan, buka de'it mak kadeira, haluha tiha nia maluk”, afirma nia.
Deputadu Bankada FRETILIN, David Dias Ximenes ‘Mandati’ hatete, nia parte reforsa nafatin ba nia rekerimentu sira ne'ebé mak nia hato'o ho sentimentu moe, tanba dehan katak atu buka tuir restu mortais erói sira nian presiza ratifika tan konvensaun internasionál ba ida-ne'e.
“Ha’u-nia hanoin Ministru se bele karik, fó atensaun ba parte ida-ne'e konvensaun ne'e iha duni karik ita buka tuir tok para ita ratifika iha ita-nia Parlamentu ida-ne'e, para ita hetan ita-nia maluk sira ne'e”, afirma nia.
Hatan ba kestaun ne'e, Ministru ba Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo hatete, nia parte rejista ona preokupasaun ne'ebé hato'o husi deputadu sira kona-ba réstu moratis eroi sira-nian ne'ebé to’o oras ne'e seidauk iha devolusaun.
“En-relasaun ho mártires no erói da pátria ne'ebé mak ha’u hanoin ha'u sei la fó resposta iha ne'e, ha'u sei toma nota hakerek tanba ida ne'e foti bebeik, e ha'u mós hato'o bebeik ba parte kompetente ne'ebé to'o oras ne'e seidauk fó informasaun mai iha PN”, informa nia. (*)
