“Atividade ba hakerek istória ne'e Jerál ba ema hotu ne'ebe mak iha interese atu hakerek no mídia ne'ebé mak iha interese atu hakerek bele hakerek importante mak tuir kritéria ne'ebé mak sosializa ona”, dehan Reprezentante Alumni Parlamentu Foinsa'e, Cesar Ferreira Amaral, iha SEJD, Lesidere, sesta (17/06).

Ba kritéria sira ne’ebé iha hanesan ezemplu husi mídia karik tenke iha materiál sira ba produz vídeo tenke kompletu, ba hirak ne'ebe hakerek istória tenke iha materiál ne’ebé presiza.

Ho atividade ne'e, hahú ona iha tinan 2021 ba tinan 2023 hanesan kompetisaun daruak nian ne’ebé organiza husi APFTL servisu hamutuk ho SEJD.

“Atividade ne'ebé hala'o relasiona ho sosializa informasaun kona-ba oinsá hakerek perfil foinsa'e sira ne'ebe mak susesu ona durante ita haree foinsa'e barak mak susesu mais informasaun ida-ne'e la to’o ba públiku ne'ebé sei sai nu’udar motivadór ba foinsa'e sira seluk atubele enfrenta dezafiu moris nian”, dehan nia.

Tanba ne’e, la’ós kompetisaun sira ne'ebé loke baibain, hanesan kompetisaun diskursu ka kompetisaun hakerek maibé ida-ne'e kompetisaun ne'ebé nakloke ba joven hotu.

Ba joven sira ne'ebé iha espiritu atu hakerek bele aprezenta sira-nia ideia iha espozisaun ne'ebé sei realiza iha tempu badak hodi bele konvense juri sira hafoin bele ba hekerek istória tarjetu.

“Ba ida-ne'e laiha so ema sira ne'ebé ita atu ba entrevista ba joven sira ne'ebé susesu ne'e nia mínimu idade mak tenke tuir politika nasionál juventude nian 15 to’o 24 mais la taka dalan ba ema sira ne'ebé 25-35 anos”, informa nia.

Relasiona ho loron rejistu ba atividade hakerek istória no produsaun vídeo sei hahú iha loron segunda (20/06), no sei públika mós iha Mídia Alumni Parlamentu Foinsa'e kona-ba saida mak sei lori atu rejistu.

Kona ba tempu hakerek istória no produz vídeo bele autór mak deside kedas nia fonte, bele mós husi Alumni Parlamentu Foinsa'e ho SEJD.

“Tempu hakerek ita iha kalendáriu se nia pasa iha espozisaun iha kalendáriu atu hakerek nia mínimu fulan-augostu nia laran to’o dezembru ita publika istória hakerek haat no vídeo haat”, hatete nia.

Iha mós kritéria espesifiku ezemplu iha área negósiu nian karik nia tenki susesu kria empregu ba nia-an rasik ka nia bele kria empregu ba ema seluk ninia atividade ne'ebé nia hala'o fó influénsia ka mudansa ba sosiedade.

Ba ema ida hakerek istória rua ho montante osan ba manán na’in hamutuk $1.500 to’o 2000 no ba produz vídeo nian iha osan $3.500 to’o 4000. (*)