Prezidente Sub-kram Munisípiu Baukau, Justiniano de Sousa SDB, hatete, durante tinan-10 estadu Timor-Leste taka arte marsiais Kera Sakti, PSHT no KORK, maibé estadu reativa hikas ona, tanba konsidera hanesan atividade desportiva.
"Ita hotu rona ona diritivas mai husi estadu nian, segundu diritiva atu ativa arte marsiais, entaun dalan ne'ebé fasilita atu hakmaan atividade, ita hala'o asaun dame atu oan sira ba oin kumpre regras sira ne'ebé estadu fó," dehan nia iha katedral vila antiga, hafoin remata asaun dame, kinta (09/06).
Tanba ne'e, membru arte marsiais sira halo route la'o ain husi áreadores katedral vila antiga haleu sidade Baukau Vila.
"Intensaun atu eduka sidadaun ne'ebé tama organizasaun utiliza didi'ak, la'os atu halo konflitu, espera orientasaun mai husi estadu ba oin labele mosu tán konflitu," nia argumenta
Tanba, estadu liuhusi Kram hamutuk ho parte relevante arte marsiais halo ona sosializasaun regras ba membru sira husi nível Aldeia to'o Munísipal, nune'e utiliza arte marsiais tuir nia dalan.
"Tuir orintasaun estadu nian formatu sira sai ona, nasionál halo ona seremónia abertura ba diritiva implementasun nian la'o ona, agora mai ona Munísipiu," nia informa
Koordenadór IKS.PTL Munísipiu Baukau, Jeronimo Freitas, agradese ba oitavu Governu, liu-liu eis Prezidente Repúblika (PR), Francisco Guterres Lú-Olo, eis Jeneral Lere Anan Timur no Primeiru Ministru, Taur Matan Ruak, tanba konsidera ona organizasaun arte marsiais tolu, hodi reativa fali.
Tanba ne'e, la tempu ona atu halo problema, maibé kria dame paz no estabilidade hodi kontribui ba dezenvolvimentu nasionál, liu-liu iha Munísipiu Baukau.
"Kera Sakti apoiu dame, hakarak paz, dame ho kolega sira," nia hatete
Koordenadór, PSHT Baukau, Alfredo Faustino Ximenes, argumenta, hakarak husi ohin ba oin, organizasaun arte marsiais tolu presiza hamutuk fali hodi kria paz no estabilidade.
"Importante Baukauoan tenke hamutuk, la'os mai hafuhu malu fali iha dalan-dalan, tempu agora tempu dezenvolvimentu," nia apela
Sekretáriu Jerál KORK Munísipiu Baukau, Nuno Derti dos Santos, hatete, prezensa organizasaun nian iha Munísipiu Baukau hakarak dame.
"Kór husi farda, mais rán la kór, labele lori kór hafahe ita, ohin ba oin ita hotu sai ema ida, KORK prontu kria dame no paz ho PSHT ho rán maluk sira husi Kera Sakti," nia informa
Enkuantu asaun dame ne'e, kompostu husi organizasaun arte marsiais hanesan Kera Sakti, Persaudaraan Setia Hati Terate, Padjaran, Seroling Dewata, Taekondow, Tungal Hati Seminar-Tungal Hati Maria (THS-THM).
Asaun ne’e, Komadante Polísia Nasionál Timor-Leste (PNTL) Munísipiu Baukau, Superintendente António De Sá, husu membru arte marsiais sira tenke hamorin Timor nia naran iha Mundu.
"Baukau tenke sente orgullu, tanba Baukau sidade daruak eh baze dahuluk ba luta rezisténsia, daruak baze ba diplomátiku, matenek na'in sai husi Baukau barak, ne'e prova iha mundu no faze datoluk Santo ho Santa, Baukau oan primeiru sai Kardiál iha timor, ne'ebé la bele hatun ita nia aan, labele sama valór ne'ebé iha," dehan nia
Foinsa'e sira tenke kontinua nafatin obra ne'ebé saudozu sira husik hela, tanba sira nia mate mak fTimor-Leste hetan independensia.
"Kontinua nafatin espíritu luta na'in sira nian liuhusi profisaun hotu-hotu, liu-liu arte marsiais sira, atu dezenvolve ita nia rain," nia informa
Husu parte arte marsiais sira atu halo kombimasaun hodi treñu hamutuk, nune'e bele hatudu unidade ba Mundu.
"Lori ita nia Bandeira lulik ne'e, eventu sira Olimpiade, Asea Games lori osan mean mai, ha'u ejize ba arte marsiais sira KORK, Kera Sakti ho PSHT tenke hamorin Timor," nia apela. (*)
