“Mai to'o tinan ida ne'e mak organizasaun tolu PSHT, IKS, KORK bele hetan ona sira-nia legalidade iha Ministériu Justisa e publika sai ona mós iha Jornál Repúblika, organizasaun tolu ne'e iha ona legalidade atubele, hala'o ona sira-nia atividade prátika ka treinamentu formasaun sira ba atividade arte marisiál iha Timor-Leste laran tomak”, dehan Prezidente Komisaun Arte Marisiál (KRAM), Octavio da Conceição, iha Salaun KRAM, SEJD, Lesidere, kuarta (27/04).
Tanba Sekretáriu Estadu Juventude Desportu nia despaixu númeru 21/SEJD/III/2022 iha nia omologa diretiva númeru 2/CRAM/2022 ne'ebé mak aprova instrusaun ba organizasaun arte marisiál ba delegasaun kompeténsia ba subkomisaun Munisípiu sira.
Ho ida ne'e, iha tinan 2022 komisaun reguladora Arte Marisiál publika sai segundu diretiva liuhusi despaixu omologasaun Sekretáriu Estadu Juventude no Desportu (SEJD) ne'ebé publika iha jornál Repúblika iha loron tersa (26/04) autorizasaun ba prosedimentu autorizasaun ba formasaun ba atividade arte marisiais no mós delegasaun kompeténsia ba estrutura iha nível munisípiu sira.
“Nune'e hakarak hatete ba públiku tomak Sekretária Estadu Juventude no Desportu (SEJD) hamutuk ho komisaun reguladora arte marisiál fó informa ba públiku tomak katak, organizasaun PSHT IKS, KORK, iha ona legalidade no lejitimidade ba sira bele hala'o sira-nia atividade iha sentru no klube no fatin sira ne'ebé prátika arte marisiál iha territóriu Timór laran tomak”, deklara nia.
Alende ne'e liuhusi segundu diretiva mós kria prosedimentu ba arte marisiál sira mak hahú iha tinan 2020, hasai rezolusaun nu. 4/2020 ne'ebé revoga rezolusaun nu. 16/2013 kona-ba extensaun grupu artemarsiais nian, liuhusi SEJD hamutuk ho KRAM hodi halo prosedimentu Administrativu hodi ba prosesu rejistu no re-rejistu no halo atualizasaun ba dadus ba organizasaun arte marisiál tolu refere.
‘Durante tinan ida tomak husi 2020-2021 publika primeira diretiva kona-ba prosesu rejistu no re-rejistu hodi atualizasaun dadus nune'e mai to'o tinan ida ne'e (2022) organizasaun tolu PSHT, KORK no IKS-TL hetan ona legalidade”, esplika nia. (*)
