“Dadaun ne'e, Sekrétariu Estadu Joventude no Desportu (SEJD) servisu hamutuk ho Governu Korea sei hari'i fasilidade ba dormitóriu (asrama) tuir planu sei estabelese iha Bekora no kontinua reabilita kampu komunitáriu ne'ebé aat ona”, informa Sekrétariu Estadu Joventude no Desportu, Abrão Saldanha 'Noko Siko' iha Salaun Konferénsia SEKOMS, Palásiu Governu, kinta (14/03).
Tanba ne’e, SEJD sei fini atleta sira ho idade ki’ik liuhusi Kompetisaun no tuir selesaun hodi tama iha dormitóriu ne’ebé prepara atubele tuir kompetisaun iha nível nasionál no internasionál.
“Sekrétariu Estadu Joventude no Desportu (SEJD) sei 'fini' atleta husi idade ki’ik, sei prepara mós Kompetisaun ba labarik atu halo selesaun ba labarik bele tama iha dormitóriu nune'e bele halo selesaun nasionál ne'e di'ak liután”, dehan nia.
Ba Orsamentu Estadu tinan 2022, SEJD propoin atu hahú estudu dezeñu ba Estadiun Munisipál tolu, no Estadiun Multifunsaun ne'ebé sei hari'i iha Hera hetan apoiu husi Governu Xina maibé seidauk iha kompromisiu ruma entre SEJD ho Governu Xina. (*)
