“Ho ida ne'e ami agradese tebes ita-boot sira-nia papél di'ak tebes importante tebes ajuda dezenvolve setor juventude no desportu, programa ida ne'e ha'u halo tanba ha'u interasaun besik liu maluk Jornálista sira”, dehan Abrao Nokosiku, iha salaun SEJD, sesta (01/03).

Tanba ne’e SEJD ho Ekipa komunikasaun hala'o sorumutu hodi fó apresiasaun ba Jornálista no Mídia iha Timor-Leste kona-ba progresu divulga informasaun atividade deportu nian ba públiku.

"Ha’u hato’o agradese no parabéns ba kolega sira, ba servisu ne'ebé halo iha tinan kotuk, ami rekoñese sein ita-boot sira-nia prezensa, kamera no rekording, se ami mesak ami-nian no populasaun sira-nia servisu la to'o ba públiku”, haktenik nia.

Husi prezensa Jornálista sira nian bele hatutan ona servisu SEJD nian ba públiku bele akompaña durante ne’e, tanba ne’e kontente haree Jornálista barak mak joven hatudu joven barak hakarak sai Jornálista

“Bainhira ha'u interasaun ho kolega Jornálista joven sira, ha'u sente konsidera Jornálista hanesan parseiru di'ak la bele hasoru maluk de'it iha tempu entervista, maibé tenke hasoru malu hanesan rotina, tanba Jornálista sira mesak joven”, dehan nia.

SEJD hanesan fontes informasaun iha programa ida kada fulan tolu hasoru maluk ho rotina, hodi fahe informasaun ba malu, ida ne'e mak objetivu prinsipál ne’ebé sei kontinua.

Editór Ajénsia Notisioza Timor-Leste, Institutu Públiku (Tatoli), Rafael Belo hatete, inisiativu husi Sekretáriu Estadu nian atu enkontru regular komunidade mídia ne’e inisiativu di'ak tebes, nune’e bele partilla informasaun pertinente ba maluk.

“Ha'u sujere mak se disponivel duni fó informasaun ho dokumentu pozitivu ofisiál sira ne'e, bele ajuda ona komunidade media sira bele divulga di'ak ba públiku”, dehan nia.

Ko'alia kona-ba prinsípiu verifikasaun dalaruan informasaun balun ladún efetivu entaun bele fasilita dokumentu ofisiál sira ne'e, atubele kompleta.

Iha parte seluk Jornálista sira mídia imprime, eletroniku no online, mós hato'o nia sujestaun, kritika no rekomendasaun ba SEJD hodi bele hala’o relasaun di’ak liután iha futuru. (*)