Tuir observasaun Pontu Fokál Forum Organizasaun Naun Governamental(FONGTIL) iha Munisípiu Covalima, Rosalino Perreira, serka sanitária ne’ebé aplika iha munisípiu Covalima fó impaktu maka’as ba komunidade atu buka ai-haan.
“Tanba antes lockdown (serka sanitária) ne'e sasán iha merkadu suai folin barratu, maibé depois lockdown sasán folin sa'e maka'as loos,” dehan Rosalino Perreira bainhira halo transmisaun Skype (VideoCall) ho monitorizasaun no avaliasaun COVID-19, iha salaun FONGTIL, Kaikoli, kuarta(3/2).
Rosalino hatutan, antes lockdown ne'e fós 25 kg iha merkadu Suai folin $13 maibé lockdown folin fós sa'e ba $14 no $15 dolar no iha Postu Administrativu Fatumea, Maucatar stock hotu ona no folin komesa sa’e maka’as ba $17.50.
Nia fó-sai katak, iha Postu Administrativu Maucatar, Suku Holpilat iha aldeia 4 hanesan Hatu, Lela, Nainare no Manulor tanba hetan estragu husi anin bo'ot no udan bo'ot hodi sobu sira-nia produtu lokál hanesan batar no fore.
Entretantu Lockdown totál ba atividade hotu iha Covalima, polísia kontinua pasa-revista iha estrada Postu Administrativu Maucatar, Fatululik, Fatumea, Fohorem no Tiliomar, hodi konfirma dokumentu transporte públiku nomoos kartaun eleitorál.
“Servisu saúde mós kontinua halo teste masal ba komunidade sira iha área fronteira nomoos halo teste ba loja na'in no negosiante sira iha merkadu, maske movimentu komunidade vila laran menus no transporte no eskola taka totál.(*)