Tuir Komandante PNTL Covalima Superentendente Polísia Antônio Maria de Sá katak, enkontru refere liga ba lockdown iha Covalima inklui ezijensia komunidade nia ba stock ai-han ne’ebé komesa menus ona.

“Ai-han báziku iha ne’e komesa menus, hanesan foos, mina bimoli no seluk tan, tanba ne'e ita komvida ita nia prezidente autoridade munisípiu no parte Sentru Integradu Jestaun Krise (SIJK), Diretór Sentr Nasionál Lojístika (SLN) hodi ko’alia kona-ba oinsa buka soslusaun ba problema ne’ebé povu iha Covalima infrenta iha situasaun Covid nia laran,” dehan Komandante Antônio www.tempotimor.com iha salaun administrasaun Munisípiu Covalima, Segunda (1/3).

Komandante ne’e akresenta, durante enkontru iha ona rezultadu balun katak, sasan sira ne’ebé sei mai husi nasionál sei halo distrubuisaun ba populasaun sira ne’ebé presiza tebes.

“Enkontru ohin ne’e hetan ona solusaun balun husi PA Munisípiu no SIJK sei fó guia de marsa no autorizasaun ba sasan sira ne'ebé mak atu mai husi Kapitál Dili," Nia informa.

lha sorin seluk Administradór Munisípiu Covalima Afonso Nogueira Nahak katak, dadaun ne’e halo hela identifikasaun ba komapñia lokál sira, oinsa atu simu foos hosi SLN, tanba foos sira ne’e munisípiu Covalima sei simu de’it ihfrinteira Covalima no Ainaro nian.

"Komesa aban ita sei buka kompañia lokál balun ne'ebé mak atu simu fos iha fronteira entre Covalima ho Ainaro. Entaun molok sasan sira ne’e ita simu, sei dezinfekta hotu,” dehan Afonso.

Entertantu observasaun www.tempotimor.com nian iha terenu nota katak, enkontru refere ko’alia mós kona-ba oinsa atu limita movimentu ema husi postu lima iha fronteira Fatululik, Tilomar, Fatumea, Fohorem no Maucatar. Atu tama iha postu Suai Vila no postu Zumalai.(*)