Rezultadu husi dezastre naturáis ne’e, halo hare barak mak monu no dasa ba rai, nune'e posibilidade rezultadu sei ladun di'ak, tanba hare foin isin mak anin estraga ona.
Situasaun ne'e halo agrikultór Arnaldo Nascimento sente triste tanba anin halo hare hotu monu tun ba rai.
“Nu'udar to'os no natar na'in triste tanba udan no anin estraga ona ami-nia hare. Agora moras covid-19 ne’e mós halo ema hotu ta'uk ba mai tanba moras ne'e perigu ba ema-nia vida, entaun halo ami komunidade susar atu hetan osan hodi sosa hahán”, dehan Arnaldo ba www.tempotimor.com iha aldeia Lesupu, sábadu (27/03).
Komunidade ne'e husu ba governu atu haree situasaun ne'ebé komunidade Lesupu hasoru tan ba oras ne'e sira-nia hare hetan estragus husi anin no udan.
Komunidade sujere ba Ministériu Agrikultura no Peskas (MAP) karik bele aloka funsionáriu sira hodi bele servisu hamutuk ho kumunidade ho seriu.
“Tanba hare iha tinan balun liubá kuandu ami hahú fila rai, ami simu mina hodi enxe iha tratór no ai-moruk balun ajuda ami hodi rega hare ne'ebé iha, mais realidade hare sira ne'e la hanesan uluk ona”, dehan nia.
Alende ne'e, fós ne'ebé governu liuhusi Ministériu Solidariedade Sosiál no Inkluzaun (MSSI) no Sentru Lojístika Nasionál (SLN) distribui ba munisípiu sira atu fa’an ba komunidade kada saka kilograma 25 ho folin dollar $9.75, maibé iha munisípiu Bobonaru hahú fa'an ba dollar $12. (*)
