Xefe Sentru Saúde Kailaku, Delfin Bere hatete, abitante na'in-rua, pesoál saúde sira hasai ona amostra ne'e foin fila husi Dili, ne’ebé konsidera área risku, entaun ekipa halo teste ba sira nune'e bele sira livre husi virus korona ne'e.

“Sira na'in-rua iha semana kotuk ne'e mak husi Dili mai, iha teste primeiru negativu, entaun agora teste ba daruak nian. Depois sira hanoin ne’ebé di'ak hodi tuir teste refere, atu nunee evita moras ne'e ba komunidade sira ne’ebé seidauk hetan moras ida ne'e, entaun tuir mai mak rezultadu nafatin negativu, signifika sira livre duni husi moras ne'e”, dehan Delfin ba jornalista www.tempotimor.com iha suku Purugua, kinta (01/04).

Hanesan servidór povu nian iha área saúde, mak bainhira ema foun tama iha teritóriu munisipál Bobonaru liliu postu Kailaku, ekipa saúde sei halo teste nune'e bele hatene sira pozitivu ka negativu.

"Hanesan xefe sentru saúde nafatin servisu no hein orientasaun husi nivél munisípiu ba to'o nasionál karik ema foun ruma ka ita-nia estudante ne’ebé ba eskola iha Dili agora dadaun sira hela iha fatin afetadu, entaun bainhira sira hakat mai iha ne'e hakarak ka lakohi ita tenke halo regulamentu ne'ebé iha tuir ita-nia matadalan halo teste hodi evita moras ne'e ba komunidade sira”, esplika nia.

Maibé, apela nafatin ba komunidade sira iha suku Purugua, Postu Administrativu Kailaku atu kooperasaun no serbisu hamutuk atubele kontra Timor-Leste livre husi Covid-19. (*)