“Semana hirak nia laran iha territóriu tomak ita rejista kazu lubuk ida, maibé ida maka’as liu mak iha Bukoli. Foufoun iha loron 21 kalan mak iha akontesimentu. Dadus temporáriu iha uma 90-resin ho eskola no uma-adat mak hetan estragu”, informa Sekretáriu Estadu Protesaun Sivíl (SEPS), Joaquim Gusmão dos Reis Martins, iha Centro Formasaun Polísia (CPF) Komoro, tersa (28/12).

Bainhira SEPS simu informasaun kona-ba situasaun dezastre husi autoridade lokál Bukoli nia, iha kuarta (22 Dezembru) oras dadeersan ne'e kedas, ekipa SEPS, liuhusi jestaun risku dezastre to’o kedan iha fatin akontesimentu

Iha loron kinta 23 dezembru 2021, ekipa sira distribui kedan apoiu materiál hahán no sasán seluk ho karáter emerjénsia.

Husi dadus uma 90 ne’ebé hetan estragu, liuhusi prosesu verifikasaun to’o iha rezultadu, hatudu katak komunidade uma-ka’in 54 de’it mak elijível atu simu materiál konstrusaun, tanba sira-nia uma hetan sobu totál husi anin. (*)