Koordenadór Forsa-Tarefa bá Prevensaun no Mitigasaun Surtu Covid-19 iha Timor-Leste, Rui Maria de Araújo hatete, ekipa konjunta iha Munisípiu Baukau, husi loron 10 to’o 11 fulan-marsu, foti 132 amostra, iha atividade buka tuir kontaktu besik husi kazu pozitivu sira iha Dili ne’ebé kontaktu balun iha Baukau.

Tanba atividade vijilánsia sintinela nomós atividade restreoalitoriu ka random sampling ba ema ne’ebé sai husi Dili iha loron 8 fulan-marsu molok atu hahú serka sanitária iha Dili.

“Ita-boot sira sei hanoin, serka sanitária ita hahú iha Dili, iha dia 9 de Marsu dadersan zero zero oras, iha dia oitu ne’e iha ema lubuk mak aproveita oportunidade sai husi Dili e posivelmente sira lori virus ne’e sai husi Dili. Tanbane’e iha munisipiu Baukau sira buka tuir ema sira ne’e e hetan duni balun. E halo teste”, afirma nia liuhusi konferénsia Imprénsa iha Sala Situasaun-Sentru Integradu Jestaun Krízi (SS-SIJK), sábadu (12/03).

Husi amostra 132 ne’e iha 92 mak negativu, 37 mak sei hein rezultadu husi laboratóriu maibé na’in-rua pozitivu iha Baukau.

Na’in-rua ne’ebé pozitivu, ida estudante medisina ne’ebé halo estajiu iha Hospital referensia Eduardo Ximenes Baukau.

Kazu detetadu ne’e residénsia hela iha aldeia Monumentu Kalma, suku lahane Oriental no postu administrativu Nain Feto, Munisípiu Dili.

Sidadaun ne’e pozitivu tanba kontaktu besik ho profesionál saúde ne’ebee anúnsia ona iha loron 10 fulan-marsu.

Maibé sidadaun ida seluk hanesan estudante ema Baukau no estuda iha institutu Ciência de Saúde, iha Baukau hela iha Aldeia Kaibilale, Suku Kaibada, postu administrativu Baukau Vila, no iha Dili hela iha Aldeia Fumentu 3, suku Komoro.

“Kazu pozitivu ida ne’e sai husi Dili ba Baukau iha dia 8 de Marsu, sa’e mikrolet ida ho ema ho ema lubuk ida. Nia to’o iha Baukau, iha profesionál saúde viziñu mak hatete, di’ak liu imi tenke ba teste tanba imi foin mak sai husi Dili, keta halo imi lori virus ne’e mai iha ne’e”, esplika Rui.

Estudante ne’e iha Dili hela ho família rasik no ema balun husi nia família iha kontaktu ho ema balun ne’ebé deteta hetan pozitivu ona husi aldeia 4 de Setembru.

“Portantu ita haree didi’ak iha ligasaun katak kazu rua iha Baukau ne’e la’ós kazu ne’ebé mosu iha komunidade nia let maibé kazu ne’ebé iha ligasaun ho kazu pozitivu sira iha Dili”, hatete ina.

Nune’e duni, ekipa konjunta iha Munisípiu Baukau iha loron 13 fulan-marsu (horisehik) rekolla ona amstra hamutuk 65, husi kontaktu besik ba kazu pozitivu sira ne’ebé.(*)