Diretór Jerál Servisu Migrasaun, Superintendente Asistente Luis Barreto, deklara desizaun Governu Indonézia entrega timoroan ne’e bazeia ba kooperasaun di’ak entre autoridade Seguransa Indonézia no PNTL.
“Atu informa de'it suspeitu ba kazu insestu iha Komoro ho naran inisial VFTS tinan 33, husi Munisípiu Manatuto, ne’ebé halai ba Kupang-Indonézia hetan kapturasaun husi Polres Baubau Provinsia NTT Kupang Timur iha loron 23 dezembru 2021. Bazeia ba kooperasaun di’ak entre autoridade Seguransa Indonézia no PNTL, no Migrasaun Indonézia entrega hikas suspeitu mai ita iha Batugade hodi kontinua halo prosesu ba nia”, dehan Luis Barretto, iha sede Servisu Migrasaun Vila-Verde, domingu (26/12).
Suspeitu ne'e nu’udar aman ki’ik, ne’ebé halo abuzu seksual hasoru oan feto ho naran inisial CeD, tinan 11 no baku mate tan vítima, iha Aldeia Moris Foun, Suku Komoro.
Hafoin ida ne'e suspeitu halai sai ba Indonézia liuhusi fronteira terestre ilegál, nune'e Komandu Jerál PNTL liu husi Servisu Informasaun Polisia halo kedas koordenasaun intensivu ho Servisu Informasaun Polísia Indonézia-NTT nian no menus husi oras 72 suspeitu ne’e hetan kedan kapturasaun iha rezidénsia família área Kupang Timur ne’ebé partense ba Polres Baubau.
Ho ida ne'e halo kedas identifikasaun iha Postu Integradu Fronteira Mota-Ain-Batugede, Komandante Postu Servisu Migrasaun Batugade entrega fali suspeitu ne’e ba Servisu Investigasaun Kriminál Nasionál (SIKN) hodi submete ba prosesu investigasaun.
Enkuantu prosesu deportasaun ne’e hetan mós partisipasaun husi Konsul Timor-Leste iha Kupang, Gito Matos, Komandante SIP, Superintendente Boavida Ribeiro, Komandante Operasaun SIKN Inspetór Xefe Mouzinho Correira, reprezentante Servisu Nasionál Intelejensia (SNI) nomós Komandante Postu Servisu Migrasaun Batugade. (*)