Diretór Rede Distribuisaun Apoiu Konsumidór, Zil Nunes husu ba komunidade sira atu informa lalais ba parte EDTL, bainhira akontese eletrisidade mate, atu buka resolve lalais.
“Sistema iha Dili mós sei manuál ka operasaun manuál, signifika bainhira akontese problema ruma iha tereñu presiza kolaborasaun entre kliénte ho EDTL, tanba até agora EDTL seidauk iha aparellu ruma ne’ebé propriu para iha problema ruma akontese iha kliénte nia fatin, automatikamente iha-ne’e bele hatene ona, tanba ne’e mak presiza kliénte sira-nia ajuda”, dehan nia ba www.tempotimor.com iha kna’ar fatin Kaikoli, kuarta (08/05).
Tanba liña eletrisidade iha Timor-Leste sistema sei utiliza operasaun manuál la hanesan ho nasaun sira seluk ne’ebé halo instalasaun husi rai okos.
“Liña eletrisidade iha Timor geografikamente ita iha ai barak, sistema ita-nia liña distribuisaun iha Dili la'ós hanesan nasaun sira seluk halo instalasaun iha rai okos hotu”, esplika nia.
Haree ba liña eletrisidade sira iha Dili maioria tuan ona, no presiza halo manutensaun ne’ebé tuir planu sei halo iha tinan 2024 nia laran. (*)