"Nia lorloron falta tanba nia feen ameasa nia katak, o la mai hamutuk ho ha’u, entaun ha’u husik tiha o, ho razaun ida ne’e nia rona liu nia feen, entaun nia falta beibeik i lorloron ita ba kaer nia iha uma lori mai, mais nia falta nafatin  no halo problema beibeik to’o tempu nia mak deside rezigna-aan", dehan Komandante Komponente Naval Komodoro Higino Das Neves, hafoin hasai boña membru F-FDTL nian iha Hera,  Segunda, (23/10).

Komandante sira deside tuir nia hakarak bazeia ba karta rezignasaun, tanba tranforma nia labele ona.

"Ita tenke tuir nia hakarak, tanba ami tranforma nia labele ona, no komandu haree katak, nia joven ida ne’ebé la merese haknaar-aan iha instituisaun ida ne’e", nia afirma.

Nia dehan, loloos joven sira mai atu hatutan falintil sira ne’ebé fakar ran nia luta, la’os atu mai buka moris di’ak iha instituisaun, tanba de’it iha liur la hetan osan.

Husi kazu ida ne’e, komandu sei deside halo lei ida atu ba futuru bele garante F-FDTL sira nia servisu, nune’e ba oin sei haree no deskuti atu iha lei ida katak, se mak deside rezigna-aan tenke selu fali estadu nia osan hahú husi nia haknaar-aan ba iha FFDTL.

"Ami agora estuda katak, ita nia lei ne’e la forte duni, ne’e mak ema kuandu mai tropas sente la di’ak halo tun sa’e para ita hasai nia, entaun komandiu sei estuda atu halo lei ida iha future, tanba ida ne’e ita gastu osan estadu nian hodi rekruta ema atu servi ita nia rai, mais loron ida nia sente baruk nia halo tun sae husu rezigna-aan, entaun estadu lakon osan de’it, ba oin lei ne’e se mak deside rezigna-aan, nia tenke selu fali estadu nia osan hahú husi nia haknaar-aan ba ne’e i ami sei deskuti atu haree lei ida ne’e", nia afirma.

Entretantu membru F-FDTL Komponente Naval, Julio Garcio Pinto ho Posto Cabo hahú haknaar-aan iha tinan 2009 no lakon nia direitu hanesan militar iha F-FDTL no sei la pretense iha instituisaun iha loron 23 fulan-outubru tinan 2023. (*)