"Tanba rai ida ne'e ema barak mak mate, nune’e husu atu hadia rai ida ne'e ho di’ak, la’os uza poder ne'e halo tuir ita nia hakarak rasik, ita tenke la’o tuir lei la’os ita rasik mak deside buat ida tuir ita nia hakarak iha lei nia leten fali, ne'e labele", dehan portavoz Efren dos Anjos, iha edifisi JP, palpasu, kinta (12/10).

Nune'e husu ba governu atu halo investigasaun kle’an no imediata hodi konfirma akuzasaun sira ligadu ho krime, abuzu poder no irregularidade sira hotu.

Liu husi prosesu investigasaun ne’e, governu bele dezenvolve programa ida ne’ebé kompreensivu hodi reforma no kapasita PSIK atu hametin ninia kapasidade ba asaun kona-ba prevensaun, detensaun investigasaun krime.

"Ami rekomenda atu halo investigasaun ba kazu ne’ebé envolve superior sira PSIK nian no aselera prosesu reforma ba PSIK", nia dehan.

Tanba alegasaun tuir karta protestu internal PSIK, deskonfia iha individu balun ne’ebé la prense rekejitus husi dekreto-lei númeru 15/2014, ho nível edukasaun diploma sekundaria de'it, maibé nomeia ba kargu xefia iha PSIK husi 2015 no kontinua nomeia to’o 2025.

Pessoal ne’e mós deskonfia komete krime ne’ebé registu iha ministeriu publiku ho komisaun anti-koorupsaun ne’ebé parte sira konstitui ona hanesan arguidu ba krime burla agravadu, tanba deskonfia simu vítima sira-nia osan (montante US$700.00) inklui abuzu poder, tanba utiliza edifisiu PSIK hodi rezolve problema partikular balun kazu sira-ne’e destaka kansela tiha de'it.

Mosu diskriminasaun husi superior PSIK nian iha prosesu formasaun ba espesialista investigador nian iha rai liur, tanba delega de’it ema konfiansa superior PSIK nian maka ba tuir formasaun iha rai liur

Durante mosu deskonfia uza poder hodi assegura pessoal konfiansa balun iha PSIK fasilita fó treinu ba ezekutivu PSIK nia oan-mane utiliza armas PSIK nian no prátika tiru iha karrega tiru PSIK nian iha área kaitehu, munisípiu likisa.

Mosu mós deskonfia kazu utiliza armas hodi ameasa ema seluk iha PSIK, tanba problema feto, bainhira vítima hato’o keixa bá superior PSIK, maibé la hola medida, tanba individu refere pertense ba superior PSIK balun nia ema konfiansa.

Durante deskonfia mós pessoal kargu xefia balun iha PSIK halo lakon motorizada estadu nian, maibé prosesu ne’e rai de’it iha superior sira-nia “gaveta” laran.

Fulan-fevereiru 2023, pessoal kargu xefia ida hetan pena suspensaun fulan-rua husi Tribunal, maibé superior PSIK kontinua promove pessoal refere hodi ezerse funsaun nu’udár xefi iha PSIK, maske komisaun funsaun públika (KFP) ho Ministru Justisa, Tiago Sarmento la aprova, ho razaun funsionariu públiku hanesan ajente administrasaun públiku ida ne’ebé hetan ona sansaun disiplinar ho suspensaun labele hetan promosaun.

Alende ne'e, iha mós kazu amante entre kargu xefia balun iha PSIK to’o baku-malu iha arredores PSIK rezulta vidru edifisiu PSIK nian rua rahun, maibé kazu ne’e parte husi PSIK uza poder ho autoridade tomak, inklu lori arma ba ameasa família feto nian hodi rezolve.

Tanba ne'e superior sira iha PSIK deskonfia taka de’it la loke prosesu disiplinar, tanba pessoal rua ne’ebé komete kazu amante ne’e nu’udar konfiansa superior PSIK nian.

"Maske ami seidauk bele konfirma lolos informasaun no akuzasaun hotu ne’ebé deskreve iha karta ne’e, maibé durante ne’e ami mós rona no observa direita irregularidade balun envolve membru PSIK no instituisaun nia funsionamentu.

Tuir sira nia observasaun, akontesimentu balun temi iha leten ne’e akontese, tanba fator oin-oin husi lideransa PSIK nian, liu-liu inkapasidade lideransa PSIK nian hodi impoin lei no regulamentu sira, no halo servisu la imparsial no diskriminasaun ba ema bazeia ba relasaun pessoal. (*)