Portavoz Relasaun Públika Komandu Jerál (PNTL), Superintendente Xefe Armando Monteiro hatete, kazu asidente tráfegu ne’ebé akontese durante fulan-8, nia laran PNTL rejista hamutuk 1.336 no iha balun ne’ebé lakon vida.
“Asidente tráfegu hirak nee akontese envolve karreta ho motorizada ne'ebé mak sidadaun sira kondus transporte halai la kontrola-an hakarak ansi atu to’o lalais hodi rezulta monu mesak, soke malu, ida-ne’e mak durante akontese ita rejista hamutuk 1.336 mate 61 iha estrada públiku”, informa Armando iha Kuartel Jerál PNTL, Kaikoli, kinta (25/08).
Tanba ne’e, iha fulan-8 laran akontese asidente tráfegu iha estrada públiku envolve transporte krareta ho motorizada rezulta vítima ne’ebé lakon vida 61, kanek grave 289 no kanek kaman 1.522 ho totál hamutuk 1.336 mak akontese iha Timor-Leste.
Ba asidente tráfegu sira ne’e akontese PNTL hanesan autoridade seguransa nafatin husu ba sidadaun sira ne’ebé uza transporte halo viajen ba mai tenke kontrola-an, labele ansi atu halai ho velosidade ne’ebé aas la kontrola hodi hamosu asidente iha estrada públiku.
“Ita husu ba sidadaun se se de’it iha karreta ho motorizada bainhira viajen respeita lei kódigu estrada, bainhira konduz motorizada tenke uza kapasete atubele salva imi-nia vida bainhira envolve iha asidente tráfegu, tanba ita ema la fa’an hanesan karreta ho motorizada, mate ne’e hotu ida-ne’e mak ita husu atu kuidadu nafatin uza transporte”, apela nia.
Ba asidente tráfegu sira ne’e akontese maioria, motorizada, tanba sidadaun sira halai la kotrola-an, depois la uza kapasete, bainhira akontese asidente rezulta kanek todan, kanek kaman no mate iha estrada públiku.
“Atu evita asidente tráfegu ema labele mate barak iha estrada públiku mak husu ita hotu tenke iha konsiénsia respeita ba regra hotu ne’e estadu hatur ona atu konduz karreta ho motorizada tenke halai ho velosidade neneik uza kapasete atubele salva vida bainhira envolve asidente tráfegu”, haktenik nia.
Tuir dadus estatistika ne’ebé www.tempotimor.com asesu, kazu asidente tráfegu ne’ebé akontese durante fulan-8, iha teritóriu Timor laran hahú iha fulan-Janeiru 153, Fevereiru 147, Marsu 196, Abril 139, Maiu 177, Juñu 178, Jullu 173no Agostu 173 ho totál hamutuk mak 1.336. (*)