Frans Cab tula hela kaixa mamuk ba nia uma. Foto Social Media.    

DILI – Brigada Frans Cab tula kaixa mamuk. La’ós tula urna ho buletin votu, tanba urna ho buletin votu Oe – Kusi Ambeno nian to’o ona iha nasionál.   

Funsionáriu CNE Oe – Kusi Ambeno esplika, kaixa mamuk ne’e soe tiha ona, no nia  foti atu tau ropa, maibé tanba iha informasaun katak nia tula buletin votu entaun polisia mós ba ka’er kedas.

“Ida ne’e polisia mós sente komik loos, maibé tanba dehan orden be sira mós hala’o de’it orden ne’e. Nia ne’e ema ki’ak ida. Nia lori kaixa mamuk sira ne’e atu tau sasan ruma,” esplika funsionáriu CNE Oe – Kusi Ambeno via telemovel ba Tempo Timor, Segunda (14/05).

Nia hatutan, loos duni katak kaixa sira ne’e durante ne’e mak tau hela buletin iha laran. Agora eleisaun mós remata ona. Rezultadu apuramentu Oe – Kusi Ambeno nian hato’o ona ba nasionál, maibé tanba de’it nia foti kaixa mamuk sira ne’e mak polisia ba ka’er.

“Kaixa sira ne’e durante ne’e so’e hela de’it iha STAE ne’eba. Kaixa mamuk, tanba rezultadu votu Oe – Kusi Ambeno nian mós haruka tiha ona ba nasionál,” nia esplika.

“Ha’u sente komik tebes tanba, ha’u tur hela ho komandante polisia Oe – Kusi Ambeno derepente nia hetan kontaktu hosi primeiru – ministru Mari Alkatiri katak tanba saida mak ema tula fali kaixa sira ne’e? Komandante husu fali ha’u, no ha’u dehan ha’u CNE la iha urna. STAE mak iha urna. Depois diretor telefone ba afinal kaixa mamuk de’it,” nia esplika.

Ne'e kaixa mamuk, la'ós urna.  

Nia esplika, hafoin eleisaun buletin votu ne’e tau iha urna, la’os tau fali ba kaixa sira ne’e.

Entretantu, komandante polisia Oe – Kusi Ambeno, Superintendente Xefe Arnaldo de Araújo mós rekoñese katak brigada Frans Cab tula de’it kaixa mamuk. La’ós tula urna ho buletin votu.

“La iha problema ida, buat sira ne’e mamuk. La iha problema ida,” hatete komandante Arnaldo.

Rezultadu provizoriu eleisaun antisipada iha Oe – Kusi Ambeno hatudu partidu AMP mak manan ho votu 22,424 (58.87%), no partidu FRETILIN hetan de’it votu 10,810 (28.38%). (Oki)