AMBENO – Pessoal saúde hamutuk ema nain 23 ne’ebé rekruta hosi ministériu saúde destaka iha Rejiaun Administrativu Espesial Oe – Kusi Ambeno (RAEOA) desde Janeiru 2018 to'o oras ne'e seidauk simu saláriu, tanba mosu problema iha funsaun públiku.
Bazeia ba dokumentu ida ne’ebé Tempo Timor asesu ho númeru referensia 85/SRS – RAEOA ZEESM TL/Gab.SRS/III/2018 katak Ministériu Saúde ho númeru referensia 208/MS/DGSC/RAEOA/III/2018 iha loron Kuarta, 7 Marsu 2018 kona – bá enkamiña lista funsionáriu foun. Nune’e mós despaixu Sekretaria Estadu Rejional Saúde iha loron 9 Marsu 2018 katak, tenke hato’o karta ne’e ba prezidente autoriedade no kopia hato’o ba funsaun públiku RAEOA. Iha biban ne’e sekretaria rejional ba saude enkamiña lista funsionariu foun ne’ebé rekrutadu hosi Ministériu Saúde iha tinan 2017, no mós salariu durante tinan 2017 Ministériu Saúde mak halo pagamentu, maibé infelizmente ministériu hapara ona salariu funsionariu foun ne’ebé koloka ba iha saúde RAEOA iha Dezembru 2017 hamutuk ema nain 23. 
Entretantu, despaisu ida seluk hosi ministériu saúde ho númeru referensia 208/MS/DGSC/RAEOA/III/2018 loron 7 Marsu 2018 katak bazeia ba karta serbisu saúde rejiaun Oe – Kusi Ambeno ho númeru referensia 43/SRAS SSROA/Adm – JP/II/2018 iha loron 6 Fevereiru 2018 Diretor Jeral Serbisu Korporativus Ministériu Saúde, José dos Reis Magno husu ba Sekretaria Rejional Saúde RAEOA, atu responsabiliza pagamentu salariu ba funsionariu nain 23 hahu hosi Janeiru 2018 ba oin.
Osan ne’ebé tenk e selu ba pessoal saúde nain 23 mak US $10,175, maibé infelizmente to’o oras ne’e seidauk selu. 
Jornalista Tempo Timor, Raimundos Oki mós iha Oe – Kusi Ambeno bainhira funsionariu foun hirak ne’e ba hasoru prezidente substitutu RAEOA, Aresnio Paixão Ban o iha nia gabinete iha Oe – Kusi Ambeno iha loron 21 Marsu foin lalais, maibé la hetan rezultadu.
“Ami konfirma ona ho funsaun públiku nasionál katak Oe – Kusi Ambeno nia osan iha, maibé funsaun públiku Oe – Kusi Ambeno mak seidauk aprova ho rajaun la klaru,” hatete dotor Paulo Colo via kontaktu telemovel ba Tempo Timor, Sesta (06/04).
“Kleur ona ami seidauk simu ami nia direitu. Lahatene tanba saida mak bele akontese hanesan ne’e,” nia hatutan. 
Liu tiha ida ne’e, Tempo Timor marka audiensia ho Arsenio Paixão Bano hodi konfirma kona – ba assuntu ne’e, no assuntu balun, maibé lakohi antende ho rajaun la klaru to’o ohin loron. (Oki)
