Sekrétariu Jerál Konsellu Vetéranus Munisípiu Baukau, Manuel da Costa Soares, sente triste, tanba CNE no Governu hanesan instituisaun estadu, maibé lahatene oráriu loron boot importante sira.
"Karik sei iha tempu CNE rona ami nia lian, se bele loron 3 marsu ne'e, husik ba veteranu sira festeja, tanba loron ne'e mak mudansa ba ohin loron ita hetan indepedensia, lolos CNE hatene loron sira importante, labele halo kalendáriu, loron ida de'it kampañia hotu-hotu kansella fó onra ba as’uain veteranu sira ne'ebé fó nia vida tomak hodi harii rai ida ne'e,"dehan Manuel iha kna'ar fatin vila antiga, segunda (21/02).
Tanba, kada tinan iha loron 3 fulan-marsu veteranu sira iha terrioriu laran tomak konsentra hamutuk iha nasionál hodi selebra.
Maibé, iha tinan-2022 fó ona kompetensia ba kada Munisípiu atu selebra loron importante ne'e iha nivél Munisípiu.
"Tinan-ida ne'e, komesa fó ona mai Munisípiu, bertabrakang fali ho oráriu CNE, ami binggun, tanba sá CNE la hatene loron importante, nia tau fali oráriu kampañia hanesan iha Baukau, dia 3 Ramos Horta ho Xanana halo kampañia soke malu kedas, ami haree sente triste," nia hatete
Maske nune'e, maibé konsellu veteranu Munisípiu Baukau kontinua prepara hodi selebra loron veteranu ho misa reflesaun no ísar bandeira.
Tuir planu misa reflesaun sei realiza iha Igreja katedra vila antiga Baukau, ísar bandeira iha resintu administrasaun Munisípal, hafoin halo long marc husi administrasaun Munisípal to'o iha sentru konvensaun Baukau vila antiga.
"Ita la'o atu sente katak, durante 24 anus ne'e ema la'o ain husi ponta leste ba loromonu, husi loromonu ba ponta leste, objetivu buka ukun raik aan, tanba ne'e ita mai to'o CCB, ne'e atu motiva ita,"nia afirma
Nune'e, apela ba veteranu hotu iha Munisípiu Baukau atu partisipa iha seremonia refere, tanba loron 3 fulan-marsu loron importante ba nasaun Timor-Leste.
Enkuantu, Tomas Ximenes Gama 'Mau-gadi' hatete, tuir oráriu iha loron 3 fulan-marsu importante ba Timor-Leste nian, lolos labele iha kampañia.
"Tuir ha'u, sira (CNE) lakonsidera, tanba loron 3 marsu ne'e iha tiha lei ona, hanesan 20 de Maiu, 28 Novembru, 20 de Augustu ne'e loron boot hotu, monu ba loron seluk ne'e bele feriadu, maibé tanba saidá loron ida 3 marsu ne'e labele feriadu," nia argumenta. (*)