“Nu’udar deputadu éne'ebe hakna’ar-an mai husi KHUNTO lamentável oituan ho regra ne'ebé komisaun nasionál eleisaun nian ne'ebé mak fó sai ona katak iha debate entre kandidatura prezidente períodu 2022-2027 sei utiliza lian portugéz. La justu ba povu maioria liliu ba sira ne'ebé iha área remota sira la kompriende lian portugéz ho di'ak”, hatete Deputadu KHUNTO, António Verdial iha plenária PN, segunda (21/02).
Tanba iha momentu debate hanesan ne'e, povu gosta liu akompaña polítika ho lian tetun atubele komprende di’ak, la'ós portugéz ne’ebé balun ladun komprende.
Maske CNE rasik hasai ona regra realiza debate ho lian portugéz bazeia ba konstituisaun RDTL iha artigu 13, kona-ba lian nasionál ho ofisiál, maibé iha númeru 2 husi artigu 13 mós sita Estadu tenke dezenvolve lian tetun iha nasaun Timor-Leste.
Deputadu KHUNTO ne'e fó ezemplu iha tinan 2017 bainhira CNE hala'o debate ho kandidatura prezidente repúblika ne'e utiliza lian tetun iha debate, maibé iha períodu ida ne'e, tanba sa CNE halo regra foun, presiza fó justifikasaun.
Maske nune'e, Deputadu Antonio Verdial lori bankada KHUNTO nia naran fó apresiasaun ba entidade tomak, hanesan estrutura públiku notariadu ne'ebé servisu hodi autentika kandidatu prezidensia sira-nian tuir prazu ne'ebé mak vigora.
“Apresia mós ba Sekretariadu Tákniku Administrasaun Estatal ne'ebé hatudu sira-nia profesionalizmu hodi verifika dokumentu kandidatura períodu 2022 e 2021 sira-nian ho adekuada”, hatete nia. (*)