Ante ne’e Prezidente Partidu Congresso Nacional para a Reconstrução de Timor-Leste (CNRT), Kay Rala Xanana Gusmão hala’o Munisípiu sira iha Timor-Laran tomak halo asaun karidade ho fó apoiu umanidade ba povu sira. Maibé assim karidade ne’e la konsege kontinua iha tempu serka sanitária ne’ebé mak estudante barak presiza duni apoiu.

“Iha tinan 2020 bainhira covid-19 tama mai Timor-Leste, lider partidu balun lori tuir mídia hodi fahé ai-han ba populasaun nu’udar asaun karidade, maibé ohin loron ho kazu ne’ebé aumenta ba bebeik, afeta difikuldade ekonómika no alimentares oioin, ba ita-nia joven no estudante sira ihá kapital Dili, ita la haree ona líder sira né'e nia asaun karidade”, deklara Xefe Bankada FRETILIN, Francisco Miranda Branco, liuhusi husi komunikadu imprensa ne'ebe www.tempotimor.com asesu, iha loron kinta (25/03).

Branco dehan, governu deside serka sanitária iha kapital nasaun, maibé líder partidu balun kontinua halibur ema barak.

“Maske estadu desidi serka sanitária iha Díli, maibé Pelo kontráriu, líder boot nasaun nian, ba halibur ema barak hodi la haktuir prosedimentu seguransa no saúde, no sei dehán tan katak covid ne’epolítika”, afirma nia.

Bankada FRETILIN louva no solidariza ho asaun karitativa ne’ebé organizasaun no individu sira halo, hodi apoiu ho nesesidade alimentares ba populasaun ka joven no estudante sira husi Munisípiu hotu ne’ebé hela ihá Kapitál Dili, durante serka sanitáriu.

Ikus liu, rekomenda ba sidadaun ida-idak, mídia, sosiedade sivíl ho líder no partidu polítiku sira, atu hamutuk ho Governu luta hasoru virus covid-19, Salva-guarda ita-nia povu no Nasaun husi konsekuénsia vital ne’ebé virus ida ne’e lori ona ba Nasaun no ema barak ihá mundu tomak.

“Ita hotu nia kontribuisaun ho ekipa saúde Sentru Integradu Gestaun Krize mak bele garante Timor-Leste nia vitória hasoru covid-19”, dehan nia.(*)