Lider importante ne'ebé Lere husu buka-malu maka Xanana Gusmão, Mari Alkatiri no José Ramos Horta.
"Na'in tolu labele haketak malu, tenke kompleta malu," dehan Xefi Estadu Maiór Jenerál FALINTIL-FDTL, Majór Jenerál Lere Anan Timur, iha Palásiu Prezidensiál, Kuarta (12/2).
Lere hatete konfia nafatin lider na'in tolu, tanba konsidera uluk lider sira-nain tolu mak iha oin hodi hamutuk ho FALINTIL sira hakotu funu kontra okupasaun Indonézia.
"Ha'u konfia, liuliu lider sira hanesan maun Mari, maun Xanana no maun José Ramos Horta, imi na'in tolu ne'e mak iha oin. Imi nia naran iha oin mak ami FALINTIL halo funu to'o mate de'it," tenik nia.
Nia esplika, Xanana lider estratéjiku, Mari jestór no jere polítiku estratéjia ne'ebé Xanana kria, no Ramos Horta hanesan pesoál diplomátika, manan simpatia mundu nian atu apoio funu.
Tanba ne'e, Lere husu atu lider nasionál sira kontinua buka malu hanesan Prezidente Repúblika, Francisco Guterres Lu Olo, Primeiru Ministru, Taur Matan Ruak, inklui Xanana, Mari no Ramos Horta hodi hamutuk hakotu impase polítika ne'ebé akontese.
Xefe Estadu ne'e afirma, FALINTIL-FDTL nafatin halo vizilansia másimu ba estabilidade soberania nasionál.(*)