Orsamentu ba apoia emerjensia iha OJE tinan fiskal 2019 hamutuk rihun $600 ne'ebé responde ba dezastre entre Janeiru to'o Dezembru 2019. Nune'e, bainhira mosu dezastre foun maka presiza tan orsamentu.
Haree ba kestaun ne'e maka ministeriu relevante sira hamutuk hodi husu ba Xefe do Governu atu buka solusaun ba orsamentu emerjensia nian.
"Agora tempu udan entaun, be estraga dalan no ponte balu, ho nune'e kordensaun entre ministerial atu kria enkontru teknika ida hodi responde ba akontesimentu ne'ebe estragu husi udan, nune'e bele normaliza fila-fali", dehan Sekretariu Estadu Protesaun Sivil, Alexandrino Xavier de Araujo, iha Palasiu Governu, Kuarta (8/1).
Iha sorumutu ho Primeiru Ministru (PM) fo orientasaun atu haree dadus sira para haruka karta depois mak ko'alia ho Ministériu Finansas karik bele hetan apoiu husi fundu kontinjensia.
Nia relata, dadus estragus husi udan, anin ho insendiu ne'ebe akontese iha tinan 2019 nune'e, konstrusaun uma iha teritoriu laran tomak hamutuk 3.698. Nune'e, akontesimentu iha fulan-Outubru tinan 2019 konstrusaun uma hamutuk 717.
Nia akresenta, dadus ne'ebe foin daudauk akontese iha Manleuana fulan-Dezembru 2019 apoiu emerjensia hamutuk 225 xefe familia.