Iha Segunda (20/04), Sentru Integradu Jestaun Krize (SIJK) konfirma katak profesor na'in ida husi Portugal ne'ebé durante ne'e hanorin iha eskola ida iha Munisipiu Likisa pozitivu Covid-19.

Profesor ne'e fila husi Portugal iha fulan Fevereiru tinan 2020 no hanorin ona estudante sira molok implementasaun estadu emerjensia.

Informasaun husi SIJK ne'e halo komunidade sira iha Munisipiu Likisa, liu-liu estudante sira ne'ebé halo ona kontatu ho profesor ne'e sente preokupa no tauk.

Estudante klase 9 ho inisial DNCS ho idade tinan 15 dehan, sira-nia profesor fila husi Portugal iha fulan Fevereiru nia laran no iha fulan Marsu hahú tama aula hodi hanorin estudante sira.

"Iha fulan Marsu komesa hanorin ami. Nia hanorin ami tuir orariu ne'ebé iha kada semana ida tama aula dala lima," informa estudante feto ne'e iha nia hela fatin iha dada Lia ho www.tempotimor.com, Munisipiu Likisa, Kuarta (22/04).

 

 

Estudante ne'e sente preokupa no tauk tanba durante prosesu aprendizajen laiha distansia fizika entre profesor ho alunu sira.

"Durante profesor sira hanorin ne'e ami besik, tanba kuandu husu perguntas sira mai besik ita mak esplika, ami besik malu la to'o tan metru ida," dehan nia.

Ho nune'e, estudante ne'e husu ba parte saúde atu halo teste ba estudante no profesor Timor-oan hotu-hotu ne'ebé halo ona kontatu ho profesor Portugues ne'e.

"Besik feriadu profesor sira sempre hamutuk ho ami, tanba iha aula hanorin, entaun keta da'et ona karik, se bele teste estudante sira i depois mós teste ba profesor sira timorense ne'ebé mak sempre akompaña sira no kondutór sira ne'ebé tula sira ba-mai."

Iha fatin ketak, estudante eskola Sekundaria klase 1 ho inisial EPTG hatete, molok feriadu tanba implementasaun estadu emerjensia, profesor portugues tama ona aula hodi hanorin estudante sira.

"(Profesor Portugues) sira mai la kleur Segunda hahú tama hanorin, ami nia Diretor ne'e tama aula semana ida dala tolu i lori materia Jeologia ho Biologia."

Estudante ne'e sente preokupa tanba durante prosesu aprendizajen laiha distansia fiziku entre profesor ho alunu sira.

"Ami iha aula laran distansia ho profesor ne'e la dook, rabat liu tanba nia hanorin ami halo esplikasaun rabat ami no mai tuur hamutuk ho ami i profesor ne'e iha relasaun di'ak ho ami," dehan nia.

Maske triste ho informasaun katak profesor Portugues ida pozitivu Covid-19, maibé estudante ne'e tauk mós virus ne'e daet ona ba ema seluk, liu-liu estudante sira.

"Se moras (Covid-19) ne'e kona ha'u entaun ha'u-nia familia sira mós sei kona hotu," dehan nia.

Estudante seluk husi eskola referensia, klase 3, ho inisial IL ho idade tinan 9 dehan, sira-nia profesor ida husi Portugal ne'ebé fila mai TL iha Fevereiru 2020 tama ona aula hodi hanorin sira.

Durante hanorin estudante sira, nia hatete, profesor ne'e mós hanorin kona-ba prevensaun Covid-19.

"Nia hanorin oinsa fase liman, keta hakuak malu," dehan estudante ne'e.

Maske hanorin kona-ba prevensaun Covid-19, maibé tuir estudante ne'e, profesor ne'e la mantein distansia fiziku ho estudante sira durante prosesu aprendizajen.

"Nia hanorin ami besik, ami tuur hanesan ne'e, nia mai tuur besik tiha ami (kuaze 30 sentimetru-red) mak asina ka nia esplika matéria," dehan nia.