"Semináriu loron ohin nian, mak garante edukasaun ida ho inkluzivu kualidade ba ema hotu atu aprende prosesu aprendijasem iha vida tomak, no hamutuk hodi komemora loron restaurasaun independensia 20 de maiu ba dala XX," dehan Diretóra AUFD, Bendita de Jesus Amaral iha salaun apuramentu Baukau, tersa (17/05).
Tanba, bazeia monitoriazaun husi AUFD ba tinan-2022 iha Munísipiu Baukau nota problema relasiona ho parte edukasaun husi parte 3.
"Infraestrutura primeiru ligadu ho saneamentu barak mak aat, difísil ba estudante atu so'e bee no foer boot, sira halo ambiente ladiak iha ambiente eskola, segundu falta bee moos sufisiente, tanba sosa de'it, eskola balun laiha bee moos, balun mós fasilidade meza kadeira sei menus, ida mak kondisaun eskola ida grave liu-liu iha Postu Venilale, difikulta ita nia estudante aprende," nia afirma
Nune’e, rezultadu monitorizasaun AUFD aprezenta ona ba Prezidente Autoridade Munísipiu, Diretór Edukasaun Munísipal no to'o iha nasionál, atu haforsa planu orsamentu jerál to'o pursentu 100 aloka ba setór edukasaun.
"Ami foka liu na ita nia orsamentu, atu aloka ba parte edukasaun, tanba nesesidade edukasaun kualidade iha nível baze, maibé iha tinan hirak liu ba konsege aumenta osan ida ne'e," nia argumenta
Sekretáriu Autoridade Munisípal Baucau, Simão dos Santos Marques Pinheiro, hatete, Administrasaun Munísipal sei halo konsultasaun ho entidades hotu hodi kontribui ba dezenvolvimentu setor edukasaun nian.
"Servisu ida mais importante ida mak setór edukasaun, ami sei reforsa servisu edukasaun Munísipal bele intende ema nia ideia ne'ebé responde ba espetativa," nia hatete
Alende ne’e, atu eleva kapasidade rekursu umanu iha nível Munísipal, la’os de'it husi edukasaun formal, maibé presiza mós husi edukasaun naun-formal.
"Agora dadaun iha ita nia leet mós iha sentru formasaun ne'ebé barak, autoridade Munísipiu buka atu kopera, nune'e bele prense ba dezenvolvimentu," nia argumenta
Partisipante, Epifania Madalena Ximenes, rekomenda ba Governu, atu investe osan iha setor edukasaun, nune'e bele hadi'a infraestrutura edukasaun iha baze.
"Edukasaun mak save importante, tanba ne'e, Ministru Edukasaun, tenke haree, buka planu para oinsá bele rezolve," nia hatete (*)