"Ida ne'e loke dalan ba governu, atu bele priexe ba vaga sira ne'ebé mamuk, tanba profesór sira balun mate, balun moras, nune'e iha duni nesesidade atu prense fali vaga sira ne'ebé mamuk ho profesór sira", dehan Minístru Prezidensia Konsellu Minístru, Fidelis Leite Magalhaes iha palásiu governu, kuarta (08/03).

Projetu dekretu-lei ne'e, aprezenta husi ministru edukasaun, juventude no desportu, Armindo Maia, alterasaun ba dekretu-lei númeru 23/2010, loron 9 fulan-dezembru, ne’ebé aprova estatutu karreira edukadór sira ba infánsia no ba profesór ensinu báziku no sekundáriu (Estatutu karreira dosente nian).

"Alterasaun ida-ne’e hakarak atu atualiza estatutu karreira dosente hodi akomoda evolusaun no dezafiu sistema edukativu daudaun nian iha Timor-Leste, atu fó kontinuidade ba dezenvolvimentu rekursu umanus nasionál, hodi promove kualifikasaun profesór sira nian no atu asegura katak, hirak ne’e tenke koloka tuir nesesidade reál país nian", nia esplika.

Tanba atu hametin valorizasaun karreira liuhusi sistema regulár sira hodi halo verifikasaun (aferisaun) ba kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian.

Dekretu-lei ne’e mós determina estabelesimentu sistema rekrutamentu ida ba dosente foun sira liuhusi kriasaun bolsa kandidatura sira nian no kria rejime espesiál ida ingresu ba profisionál sira edukasaun nian ne’ebé dedika an ba ensinu ne’ebé hetan ona abilitasaun mínima tuir lei haruka hodi bele tama ba karreira.

Nune’e, alterasaun sira ba estatutu karreira dosente atu garante kualidade ensinu no profesór sira nian, hodi promove meiu sira atu halo selesaun, verifikasaun no kolokasaun husi rekursu sira, bazeia ba méritu no profisionalizmu, no ho adaptasaun ba nesesidade nasionál sira.

"Ba indivídu kontratadu sira ne’ebé ezerse hela funsaun dosente durante tinan 2023, maibé laiha abilitasaun akadémika mínima ne’ebé presiza atu sai dosente, sei garante oportunidade atu hili kona-ba sira nia futuru, hanesan rekoñesimentu ba sira nia dedikasaun ba sistema edukasaun nasionál nian", nia hatutan.

Nune’e, sira bele hili entre kontratu provimentu ba tempu indeterminadu atu ezerse funsaun administrativa ka funsaun apoiu ba dosénsia, ho remunerasaun ekivalente ba Grau D, eskalaun dahuluk, husi rejime jerál administrasaun públika nian, ka indemnizasaun ida hanesan kompensasaun ba dedikasaun tempu servisu nian, ho valór saláriu ida ba tinan tolu ida-idak iha ne’ebé nia ezerse funsaun sira, tuir períodu kontratasaun ne’ebé rejista ona iha SIGAP. (*)