Tempotimor (Dili)-Fatin ba estabelesimentu planta Liquefied Natural Gas (LNG) hahú sai polemika hafoin mosu informasaun husi deputadu balun iha Parlamentu Nasionál katak Xefe Negosiadór ba Demilimitasaun Fronteira Maritima Kay Rala Xanana Gusmão deside hodi muda fatin planta LNG husi Beasu, Munisipiu Vikeke, ba Natarbora, Munisipiu Manatuto.

Deputadu husi bankada FRETILIN Fabião de Oliveira foin lalais ne’e informa katak, Xefe Negosiadór halo ona negosiasaun ho komunidade sira iha Beasu, maibé komunidade nia proposta ba indinimizasaun boot liu.

Tuir informasaun ne’ebé deputadu ne’e simu, tanba laiha konkordansia ba malu, Xanana deside hodi muda fali planta LNG ba Natarbora, Munisipiu Manatuto.

"Ha'u mós rona katak (planta LNG) la akontese iha Beasu maibé muda fali ba Natarbora, entaun se la akontese iha Beasu signifika dezentendimentu entre Xefe Negosiadór ho ita-nia populasaun sira kona-ba indiminizasaun," informa deputadu Fabião iha Parlamentu Nasionál (PN), Kinta (05/12/19).

Lee mós: Xanana Rende Harii Planta LNG iha Beasu, Posibilidade Muda ba Natarbora

Deputadu Fabião hatutan, mosu mós dezintendimentu entre Xefe Suku ho populasaun balun.

“Ami so hatene dei't informasaun sira ne'ebé mak ami-nia militante sira telefone mai fó hatene. Husi fali parte seluk hanesan ne'e ami mós la hatene,” dehan nia.

Tuir nia haree, mosu mós dezintendimentu entre grupu partidaria, liu-liu entre militante CNRT no FRETILIN.

“Buat ne'e ami haree grupu partidaria mós dezentendimentu hotu. Ezemplu Xefe Suku mai husi partidu CNRT nian, balun mai husi FRETILIN nian, entaun dezentendimentu iha ne'e, tuir ami nia haree ida ne'e mak konfuzaun uitoan,” deklara nia.

Husu Governu Fó Razaun

Deputadu husi bankada FRETILIN seluk, Dário Madeira husu ba governu atu fó razaun kona-ba mudansa planta LNG husi Beasu ba Natarbora.

"Projeitu instalasaun planta LNG ne'e prozeta ona ba mundu tomak katak planta LNG ne'e sei mai tau iha Beasu. Iha tinan 2015 halo ona estudu lubuk ida, ne'ebé iha estudu ne'e hatudu rezultadu katak laiha dúvida kuandu planta LNG mai tau iha Beasu, ne'ebé gasta ona povu-nia osan lubuk ida iha ne'ebá ne'ebé halo estudu de'it," dehan deputadu Dário iha plenária PN, Tersa (10/12/19).

Tuir nia, bainhira Xefe Negosiadór halo negosiasaun ho populasaun sira iha Beasu, suku Maluru, populasahn husu indeminizasaun boot, maibé ikus mai populasaun retira proposta hodi fó rai gratuita ba estadu atu harii planta LNG.

Maibé, nia dehan, ikus mai populasaun sira iha Maluru hakfodak rona informasaun katak planta LNG muda fali ba Natarbora.

"Agora ne'e governu nia hakarak saida?, tanba komunidade Beasu, suku Maluru ne'e sira preokupa hela, derepente de'it sira rona desizaun muda tiha ona, katak muda fila fali ba Natarbora," dehan Dário.

Tuir nia, presiza fó esplikasaun klaru ba populasaun sira, liu-liu iha Suku Maluru, tanba sira sai vitima husi planu harii planta LNG ne’e.

"Loloos ne'e Programa Nasional Dezenvolvimentu Suku (PNDS) nia osan tinan rua (2018-2019) tama iha ne'ebá populasaun sira la ezekuta, tanba planta LNG tama fali ne'e bele destroi saida mak halo ona," nia hatete.

Tempotimor (Dili)-Deputadau husi Bankada KHUNTO hato’o hikas preokupasaun kona-ba problema bee-moos ne’ebé komunidade sira iha Hera, inklui nia rasik hasoru. Problema falta bee-moos ne’e halo deputada ne’e tenke hariis bee galon lorloron.

Tempotimor (Dili)-Gravasaun lian haksesuk-malu entre Vise Ministru Saúde na’in rua, Elia dos Santos Reis Amaral ho Bonifacio Mau Coli, konsege sai viral iha media sosial. Responde ba ida ne’e, governu hahú ona investiga see mak grava no sirkula gravasaun lian Elia ho Mau Coli.

Sekretariu Estadu Komunikasaun Sosial (SEKomS) Mericio Juvinal dos Reis Akara dehan, investigasaun mak sei determina see mak fó sai gravasaun lian ne’e.

Favor Loke Video

https://www.youtube.com/watch?v=vmxicMU14t4

"Investigasaun mak sei hatudu, sala ne'e iha ne'ebé, iha era dijital ne'e tenke kuidadu, ne'ebé atu justifika video ne'e di'ak ka la di'ak. Se problema ne'e mak ami governu lamenta, ne'e mak ami atu investiga ne'e, kuandu iha ona rezultadu, mak ida ne'e halo sala ne'e, nia sei hetan konsekuénsia," dehan Akara.

Entretantu, relasiona ho gravasaun lian ne’e, deputadu husi bankada FRETILIN iha Parlamentu Nasionál husu atu tenke iha medida ekilibriu ba Elia no Mau Coli.

"Médida ne'e tenke ekilibriu. Ba governante na'in rua ne'e mós tenke iha médida, ida ne'e reflete ba governasaun ida ne'ebé laiha responsabilidade, tanba deskute iha públiku la'os interese nasionál no interese povu, maibé interese sira na'in rua nian, interese kadeira nian, interese ukun nian," dehan Vise Prezidente Bankada Fretilin Francisco Miranda Branco iha plenária, Segunda (09/12/19).

Tuir nia, ema ne’ebé halo gravasaun no sirkula ba públiku ne’e la’os kestaun importante atu kestiona, tanba kestaun importante mak lider na’in rua ne’ebé diskuti-malu.

"Ida ne'ebé fó sai ba públiku ne'e la'os importante, maibé ida ne'ebé importante mak lider na'in rua ne'e dekute kona-ba poder. La'os diskuti asuntu nasionál iha seitór síviku saúde nian maibé diskuti ba sira na'in rua nia problema kona-ba ba kaer ukun. Ida ne'e ha'u hanoin eskándalu ida ne'ebé Primeiru Ministru (PM) tenke foti médida," deklara Branco.

Tempotimor (Dili) – Bankada FRETILIN iha Parlamentu Nasionál (PN) liuhosi deputadu Favião de Oliveira hatete, alterasaun ba Lei Pensaun Vitalisia (LPV), kompetensia AMP nian.

"Kona-ba pensaun vitalisia ne'e kompeténsia AMP nian. Tanba uluk, sira dehan iha kampaíña katak, se ami mak manan ka kaer ukun, ami sei halakon lei pensaun vitalisia. Maibé, agora sira mak propoin fali millaun $6, ne'e problema sira nian," dehan deputadu husi bankada FRETILIN ne'e iha Parlamentu Nasionál, Kuarta (04/12/19).

Favião afirma, FRETILIN apoiu totál bainhira AMP hakarak halakon LPV. Entaun, AMP mak ko'alia, AMP mak tenke halo lakon.

"Sira mak ko'alia, sira rasik mak tenke halo lakon.  Tanba ne'e, ami lakohi tau ami nia kanuru tohar. Ida ne'e, kestaun sira nian. Sira rasik mak promete ba povu," dehan Favião.

Hatán ba kestaun ne'e, deputadu CNRT Patrocino dos Reis katak, vizaun hotu la'o ba alterasaun LPV. Maibé, buat hotu la'ós fasíl.

"Vontade hotu iha. Prosesu hotu la'o. Vizaun ne'ebé hateke ba iha ne'ebá, maibé komprimísiu ida ne'ebé atu la'o ne'e la'ós buat hotu fasil, hanesan ita fila ita-nia liman de'it," dehan Patrocino.

AMP uluk kedas iha hanoin atu halakon LPV. Iha kampaíña molok eleisaun, AMP promete atu halakon LPV. Maibé, to'o ohin loron LPV sei nafatin vigora. Aat liu, governu propoin tan millaun $6, hodi sustenta LPV.

Tempotimor (Dili)-Primeiru Ministru governu Aliansa Mudansa ba Progresu (AMP) Taur Matan Ruak ikus mai “hiit-liman rua” ba deputadu sira iha Parlamentu Nasionál ne’ebé la konkorda ho montante orsamentu iha proposta Orsamentu Jeral Estadu (OJE) 2020.