“Planu rekrutamentu ida ne'e, PNTL mós husu kedas karik iha posibilidade tinan ida ne'e, maibé ita hotu hatene situasaun, depois atividade ne'ebé polisía nasionál halo ho orsamentu ne'ebé iha, mak la konsege 2022 ida ne'e, katak sei halo filafali iha tempu mai”, dehan Komisáriu Faustino hafoin hasoru malu ho PR Lú Olo iha Palasíu Prezidensiál Bairopite, kinta (17/02).
Maske antes ne'e, Komisáriu Faustino da Costa rasik afirma, intituisaaun PNTL planea atu rekruta kadetes foun iha tinan 2022, maibé la konsege.
“Ha'u hanoin Ministériu Interior no PNTL simu despaisu konjuntu ida husi Ministériu Defeza atu halo rekrutamentu ba kadetes foun Polisía nia iha tinan oin, ne'ebé Planeia ona”, dehan Komisáriu Faustino, iha Kuartel Jerál PNTL Kaikoli, kuarta (20/10/2022).
Nune'e komandu Jerál fó ona kompeténsia ba segundu komadante PNTL, Komisáriu Polisía Mateus Fernandes sei lidera komisaun ba rekrutamentu
“Ami-nia esperansa katak ho despaisu ne'e bele mós iha orsamentu ba rekrutamentu atu ekipa husi Ministériu Defeza no Ministériu Interior hamutuk ho PNTL hala'o serbisu”, hatete nia.
Alende ne'e, Komandante Tránzitu Munisípiu Dili, Inspetór Domingos Sarmento Gama, husu ba komandu jerál atu halo polítika ruma, nune'e ba futuru Governu bele rekruta tan membru PNTL foun hodi aumenta ba iha polísia tránzitu Dili.
“Tanba Dili kapitál nasaun nian, entaun movimentu ne'e loron ba loron aumenta. Entaun iha futuru oinsá komandu bele aumenta tan rekursu ou halo tan polítika ruma ba futuru, atu Governu rekruta tan polisía foun, nune'e bele aumenta polisía tranzitu Dili”, dehan nia iha Komandu Munisípiu Dili, tersa (04/01).
La espera katak númeru asidente no insidente fatal ne'e atu tun, tanba lorloron komúnidade sira hola transporte aumenta, entaun númeru transporte aumenta, siknifika asidente mós númeru sei aumenta.
“Ita iha menbru totál efetivu iha tránzitu munisípiu Dili hamutuk 90 pesoál, maibé ativu servisu 88 de'it, iha na'in-2 mak la hala'o servisu, tanba hetan moras struk, entaun númeru ativu servisu mak 88 pesoás”, dehan nia. (*)
